ANG direktor ng Philippine National Police Highway Patrol Group (PNP-HPG), si Brigadier General Jessie B. Tamayao, ay kusang bumaba sa kanyang puwesto noong Miyerkules matapos siyang akusahan ng sexual misconduct ng isa niyang babaeng tauhan, kasabay ng pagdiriwang ng National Women’s Month sa bansa.

“Upang matiyak ang ganap na walang kinikilingan, patas, at malinaw na pagsasagawa ng imbestigasyon, nagpasya akong kusang bumaba sa aking posisyon bilang Acting Director ng PNP Highway Patrol Group, epektibo agad,” ani ng opisyal na dalawang linggo pa lamang sa puwesto. Wala pang opisyal na ulat kung sino ang papalit sa kanya sa oras ng pagsulat.

“Ang aking pagbibitiw ay hindi pag-amin ng kasalanan, kundi pagpapakita ng aking paggalang sa due process at sa reputasyon ng Philippine National Police,” dagdag niya.

Ayon pa kay Tamayao, sa loob ng 30 taon niyang serbisyo ay hindi pa siya nasangkot sa ganitong uri ng reklamo at umangat siya sa ranggo dahil sa sipag, tiyaga, at integridad. Aniya, ang kanyang pagbaba sa puwesto ay upang maiwasan ang anumang pagdududa ng impluwensya o conflict of interest habang isinasagawa ang imbestigasyon.

Ginawa niya ang desisyong ito ilang oras matapos panawagan ng National Police Commission (Napolcom) Vice Chairman at Executive Officer na si Commissioner Rafael Vicente R. Calinisan sa PNP chief na si General Jose Melencio C. Nartatez Jr. na alisin siya sa kanyang posisyon.

Ayon sa Napolcom, nakatanggap sila ng administratibong reklamo laban kay Tamayao, at isinampa rin umano laban sa kanya ang kasong kriminal dahil sa paglabag sa RA 7877 o Anti-Sexual Harassment Act of 1995 at RA 10173 o Data Privacy Act of 2012.

Dahil dito, inirekomenda ang agarang pagtanggal kay Tamayao sa kanyang puwesto at ang kanyang reassignment sa Personnel Holding and Accounting Unit (PHAU) upang mapanatili ang integridad, pagiging patas, at kredibilidad ng imbestigasyon.

Iginiit naman ni Tamayao ang kanyang pagiging inosente.

“Nais kong linawin nang buong katiyakan na ako ay walang sala sa mga paratang na ito. Lagi kong pinairal ang propesyonalismo at respeto sa aking mga kasamahan at sa publiko. Mariin kong itinatanggi ang mga akusasyon. Maaaring ito ay isang personal na paghihiganti na hindi ko alam ang dahilan,” ani niya.

Dagdag pa niya, kinikilala niya ang bigat ng reklamo at handa siyang makipagtulungan sa masusing imbestigasyon upang malinis ang kanyang pangalan. Hiniling din niya ang pagiging patas at ang paggalang sa kanyang karapatang mapresumang inosente hanggang sa matapos ang proseso.

Ang nagreklamo, isang Police Non-Commissioned Officer na nakatalaga sa Regional Highway Patrol Unit 4-A, ay nagsumite ng limang pahinang sinumpaang salaysay sa Napolcom Inspection, Monitoring and Investigation Service (IMIS).

Hinihiling ng babaeng tauhan ang pagpapatalsik kay Tamayao dahil sa paglabag sa Anti-Sexual Harassment Act at Data Privacy Act.

Ayon sa kanyang reklamo, inanyayahan umano siya ng opisyal na makipagtalik at hinipuan ang kanyang puwitan. Dagdag pa niya, may kasamang pananakot ang mga pahayag at kilos ng opisyal, kabilang ang banta na ililipat siya sa Mindanao kapag hindi siya pumayag.

Inakusahan din niya ang opisyal na inaccess ang kanyang cellphone nang walang pahintulot, binasa ang kanyang mga mensahe, at kumuha ng litrato ng kanyang mga larawan at usapan mula sa kanyang gallery, Messenger, at Viber.

Ayon pa sa kanya, nagbanta umano ang opisyal na gagamitin ang mga ito laban sa kanya kung isusumbong niya ang insidente sa dating direktor ng PNP-HPG at ngayo’y direktor ng Police Regional Office 4-A na si Brig. Gen. Hansel M. Marantan.

“Sana ay maging aral sa mga tulad niyang nag-aabuso sa mga kababaihan, na hindi lahat ng babae ay magpapadala sa takot. May mga maninindigan para sa karapatan ng kababaihan, anuman ang kanilang estado sa buhay at lipunan. Walang sinumang lalaki o kahit sino ang may karapatang mang-abuso sa amin. Hindi dahil hiwalay kami sa asawa ay maaari na kaming bastusin,” pahayag ng nagreklamo.

Mariing itinanggi ni Brig. Gen. Tamayao ang lahat ng paratang at nangakong haharapin ang kanyang nag-akusa sa korte.