HINAMON ni House Committee on Good Government and Public Accountability Chair Joel Chua ng Maynila noong Lunes si Bise Presidente Sara Z. Duterte na personal na dumalo sa pagdinig ng impeachment at harapin ang umano’y kanyang “bagman” na saksi na si Ramil L. Madriaga, kasunod ng pahayag ng kanyang mga legal na tagasuporta na siya ang “pinakamahinang ugnay” (weakest link).

Ayon kay Chua, dapat subukin ang alegasyon laban kay Madriaga sa tamang forum—ang mga pagdinig sa Kamara—sa halip na sa mga press briefing o sa pamamagitan ng mga petisyon na naglalayong itigil ang proseso.

“Kung sinasabi nilang sinungaling at ‘weakest link’ si Madriaga, mas lalo nilang dapat harapin ang pagdinig para mapatunayan iyon. Hindi puwedeng sa labas lang magsalita, pero sa loob ng proseso ay umiiwas,” ani Chua, na isang abogado at miyembro ng House Committee on Justice, sa isang pahayag.

Tumugon si Chua sa mga pahayag ng dating presidential spokesman na si Salvador Panelo na nagsabing hindi maaasahan si Madriaga.

Iginiit niya na ang ganitong mga pahayag ay lalo lamang nagpapatibay sa pangangailangang humarap si Duterte sa pagdinig.

“Kung naniniwala si Atty. Panelo na si G. Madriaga ang ‘weakest link,’ mas lalong may dahilan para dumalo si Bise Presidente Sara Duterte sa pagdinig at subukin ang pahayag na iyon sa ilalim ng panunumpa. Hindi sa press briefing sinusukat ang kredibilidad—tama na ang puro propaganda—sa ebidensya at sa proseso natin ito dapat daanin,” sabi ni Chua.

Binigyang-diin niya na ang mga pagdinig sa impeachment ay pinamamahalaan ng mga alituntunin ng Konstitusyon at due process, kung saan parehong panig ay may pagkakataong maglahad ng ebidensya at hamunin ang mga saksi.

“Ang tamang lugar para kuwestiyunin ang sinumang saksi—kabilang si G. Madriaga—ay ang pagdinig sa Kamara. Hindi sapat ang sabihing ‘mahina ang saksi’ kung hindi naman ito hinaharap at sinusubok sa tamang forum. Ang due process ay para sa magkabilang panig—may pagkakataon si VP Sara na ipagtanggol ang sarili sa komite,” dagdag ni Chua.

Itinuro rin ni Chua ang aniya’y kontradiksyon sa kampo ng Bise Presidente—ang pagkuwestiyon sa kredibilidad ng saksi habang sabay na humihingi ng tulong sa Korte Suprema upang ipatigil ang mga pagdinig.

“Magkaiba ang sinasabi at ginagawa. Sa isang banda, sinasabing ‘mahina ang saksi.’ Sa kabilang banda, humihingi ng TRO at hindi naman humaharap sa pagdinig kung saan puwedeng patunayan iyon. Kung talagang mahina ang ebidensya, bakit hindi harapin?” ani Chua.

Inulit ni Chua na ang proseso ng impeachment ay nakabatay sa ebidensya at nakasandig sa Konstitusyon, mga desisyon ng Korte Suprema, at mga patakaran ng Kamara, at ang mga alegasyon laban sa sinumang saksi ay dapat subukin sa loob ng balangkas na iyon.

“Ang impeachment proceedings ay nakabatay sa ebidensya at pinamamahalaan ng mga patakaran. Ang mga alegasyon tungkol sa kredibilidad ng saksi ay dapat subukin sa loob ng balangkas na iyon. Ang anumang pagtatangkang iwasan ang pagdinig habang inaakusahan ang saksi sa labas nito ay nagbubukas ng seryosong mga tanong tungkol sa pagkakapare-pareho ng kanilang paninindigan,” aniya.

Noong Linggo, hinikayat din ni House Committee on Public Accounts Chair Terry L. Ridon ng Bicol Saro Party-list si Duterte na personal na dumalo sa pagdinig ng impeachment sa Abril 14, at binigyang-diin na ang tamang lugar para tugunan ang mga alegasyon at hamunin si Madriaga ay ang House Committee on Justice, hindi ang media briefings.

Sa pakikipag-usap sa mga mamamahayag, binalewala ni Ridon ang mga pahayag ni Panelo, na naunang nagsabing si Madriaga ang umano’y “weakest link” at maaaring mabasag ang kanyang testimonya sa pagtatanong.

“Una sa lahat, sino ba si Atty. Panelo sa impeachment proceedings na ito? Siya ay abogado lamang ng Bise Presidente sa kanyang kasong perjury, kaya sa tingin ko ay wala siyang kapangyarihan para magkomento sa takbo ng defense panel strategy sa usaping ito,” ani Ridon.

“Ang dapat nagsasalita rito ay mga miyembro ng Duterte Defense Panel sa impeachment proceedings, hindi ang abogado… para sabihin niya na weakest link si G. Madriaga,” dagdag niya.

Binigyang-diin ni Ridon na kung naniniwala ang kampo ng Bise Presidente na mahina ang testimonya ni Madriaga, ang solusyon ay hindi press conference kundi ang direktang paglahok sa mga pagdinig.

“Kung sinasabi nilang weakest link si G. Madriaga, ang remedyo rito ay hindi press conference kundi ang mga pagdinig sa Abril,” ani Ridon.

Dagdag pa niya, ang mga pahayag sa publiko bago ang pagdinig ay maaaring pagtatangkang impluwensiyahan ang pananaw ng publiko.

“Ayon nga kay Atty. Panelo, nagpapatawag sila ng press conference ngayong araw upang maunahan ang magaganap na pagdinig sa Abril 14—baka raw may maniwala,” ani Ridon.