NAGBABALA ang Bureau of Immigration (BI) sa mga Pilipino tungkol sa mga ilegal na “backdoor” exit schemes na ginagawa ng mga sindikato ng human trafficking sa gitna ng repatriation ng mga biktima ng human trafficking.

Ang babala ay kasunod ng ulat mula sa Immigration Protection and Border Enforcement Section (I-PROBES) kaugnay ng repatriation ng isang 24-taong-gulang na Pilipina na dumating noong Marso 23.

Ayon sa ulat, umalis sa bansa ang Pilipinas noong Mayo 31, 2025 sakay ng bangka mula Tawi-Tawi na dumaan sa Sabah, Kota Kinabalu, at Kuala Lumpur bago makarating sa Phnom Penh at Bavet, Cambodia.

Ibinahagi ng biktima na siya ay na-recruit sa pamamagitan ng Telegram bilang receptionist sa Myanmar at may sahod na $900 hanggang $1,200.

Ngunit matapos siyang pilitin na magtrabaho bilang love scam operator sa loob ng dalawang buwan, siya ay ibinenta sa isa pang kompanya at pinilit na gumawa ng scam activities sa loob ng ilang buwan.

Dagdag pa ng biktima, siya ay bumiyahe sakay ng bangka kasama ang ilang hindi kilalang Pilipino na lumabas din sa bansa sa pamamagitan ng ilegal na ruta patungong Myanmar.

“Ang patuloy na repatriation ng mga biktima ay nagpapakita ng panganib ng mga scheme na ito. Marami sa mga umaalis sa ilegal na ruta ay nauuwi sa mapagsamantalang kalagayan,” sabi ni BI Commissioner Joel Anthony Viado.

Binigyang-diin ng BI na ang mga indibidwal na lumalabas ng bansa sa pamamagitan ng hindi awtorisadong paraan ay mas lantad sa exploitation dahil sila ay nawawalan ng legal na proteksyon mula sa pamahalaan sa ibang bansa.