ANG mga paglilitis sa impeachment laban kay Pangalawang Pangulo Sara Z. Duterte ay dapat resolbahin batay sa ebidensiya at pananagutan, hindi sa mga kalkulasyong pampulitika na nakaugnay sa halalan ng 2028, ayon kay House Committee on Higher and Technical Education Chair Jude Acidre noong Linggo.

Si Acidre, na miyembro rin ng House Committee on Justice, ay naglabas ng pahayag habang nagpapatuloy ang mga pagdinig ng komite upang tukuyin kung may sapat na batayan (probable cause) sa mga natitirang reklamo sa impeachment.

May ilang mambabatas umano ang isinasaalang-alang ang mga aspektong pulitikal, kabilang ang nakikitang lakas ni Duterte, sa kanilang pagpapasya.

Binigyang-diin ng chairman ng House Committee on Higher and Technical Education na hindi kakaiba ang takot o pag-aatubili sa isang prosesong puno ng pulitika, ngunit kailangang harapin ng mga mambabatas ang pangunahing usapin ng pananagutan.

“Pwedeng mayroong takot, mayroong pangamba. Normal ‘yun kasi politika ‘to. Pero dapat ang tanong na hindi dapat iniiwasan, dapat ba ma-impeach ang Bise Presidente o hindi?” ani Acidre.

“May nagawa ba? Dapat ba natin siyang panagutin sa isang bagay?” dagdag pa niya.

Tinuligsa rin ni Acidre ang ideya na dapat magpasya agad o magkakapareho ang pasya ng mga mambabatas, at sinabing ang bigat ng impeachment ay nangangailangan ng masusing paghusga.

“Hindi ko iniisip na hadlang kung nag-iisip nang mabuti ang mga kongresista bago magpasya. Dapat lang,” paliwanag niya.

Dagdag pa niya: “Pinag-uusapan natin ang isang mataas na opisyal ng gobyerno na may napakalaking mandato, at iyon pa lang ay naglalagay sa kanya sa magandang posisyon para sa susunod na halalan. Utang natin sa taumbayan na magbigay ng balanseng pag-unawa.”

Sinabi rin ni Acidre na ginagamit ng Kamara ang mga pagdinig upang matiyak na lubos na nabibigyang-kaalaman ang lahat ng miyembro, kabilang ang mga hindi nakibahagi sa mga naunang imbestigasyon noong ika-19 na Kongreso.

“Kaya ginagawa natin, talagang kapag may hearing, sinusubukan naming himayin. Hindi lang ‘yan para sa miyembro ng Justice Committee, ‘yan din ay para sa mga kasamahan namin na nakikinig at nagbabalanse pa,” ani Acidre.

Ang mga reklamong impeachment laban kay Duterte ay nagmula sa mga isyung tinalakay sa mga naunang imbestigasyon ng Kamara, kabilang ang umano’y maling paggamit ng confidential funds, hindi maipaliwanag na yaman, at iba pang usapin ng pananagutan.

Ang Committee on Justice, na pinamumunuan ni Batangas Rep. Gerville “Jinky Bitrics” Luistro, ay kasalukuyang sinusuri kung may sapat na batayan upang iakyat ang kaso sa Senado para sa paglilitis.