IPINAHAYAG ni Terry Ridon, Chair ng House Committee on Public Accounts, noong Sabado ang kumpiyansa na makukuha ng Kamara ang kinakailangang one-third na boto upang ma-impeach si Vice President Sara Duterte.

Aniya, “hindi mahirap lampasan” ang nasabing threshold habang patungo na ang kaso sa paglilitis sa Senado.

Sa kanyang panayam sa Saturday News Forum sa Dapo Restaurant sa Quezon City, sinabi ni Ridon na ang 53–0 boto ng House Committee on Justice na may probable cause ay naglalagay sa

Kamara sa magandang posisyon upang maabot ang 106 boto na kailangan para sa impeachment.

“‘Yung boto ng probable cause, 53 votes na po ‘yun. So ang kailangan lang naman po namin ay 106 votes para ma-impeach,” ani Ridon, na isa ring abogado at kasapi ng Committee on Justice.

Sa mahigit 300 miyembro ng Kamara, sinabi ni Ridon na abot-kamay ang kinakailangang one-third na boto.

“Tingin ko naman, that is a number that will not be difficult to surmount at makuha,” aniya.

Ayon pa kay Ridon, inaasahang aaprubahan ng Justice panel sa Lunes ang ulat ng komite na naglalaman ng pinal na consolidated articles of impeachment, pati ang kaukulang resolusyon.

“Ako ay kumpiyansa na sa loob ng susunod na dalawang linggo, magkakaroon na ng debate sa plenaryo tungkol sa impeachment ni Vice President Sara Duterte,” aniya.

Binigyang-diin niya na unang hakbang ang pag-apruba sa plenaryo bago bumuo ng prosecution panel.

“Kapag naaprubahan na sa committee level, dadalhin ito sa plenaryo sa susunod na linggo. Pagdedebatehan na po ‘yan doon,” ani Ridon.

“Kapag natapos na po sa plenaryo, sa loob ng dalawang linggo maaari na nating i-transmit ang kaso sa Senado,” dagdag niya.

Sinabi rin ni Ridon na tatalakayin ang pagpili ng mga public at private prosecutors pagkatapos lamang maaprubahan ang impeachment, at may ilang pangalan na umuugong bilang posibleng bahagi ng panel, kabilang sina Chel Diokno at Leila de Lima, pati iba pang mambabatas.

Ipinunto ni Ridon ang tatlong pangunahing haligi ng kaso: umano’y maling paggamit ng confidential funds, hindi maipaliwanag na yaman, at mga banta laban kay Pangulong Ferdinand Marcos Jr. at iba pang matataas na opisyal.

Binanggit din niya ang direktiba ng Commission on Audit (CoA) na nag-uutos sa Bise Presidente na isauli ang P448 milyong confidential funds.

Itinuro rin ni Ridon ang mga financial records na nagpapakita ng P6.77 bilyong kabuuang transaksyon na kinasasangkutan ni Duterte at ng kanyang asawa—P4.4 bilyon na inflows, P1.5 bilyon na outflows na hindi naitala sa kanyang Statements of Assets, Liabilities, and Net Worth, at P2.8 bilyong balanse na hindi rin idineklara.

Binanggit din niya ang paulit-ulit na banta ni Duterte laban sa Pangulo, at iginiit na nananatiling seryoso ang mga ito kahit pa sinasabing may kondisyon.

Sa huli, sinabi ni Ridon na ang mga mambabatas ang magpapasya batay sa kanilang konsensya at sa ebidensiyang iniharap, ngunit nananatili siyang kumpiyansa na sapat ang kaso upang makumbinsi ang mga ito.

“Sa dulo, sila ang magpapasya batay sa ebidensya at konsensya,” ani Ridon.

“Pero naniniwala ako na kahit pumili sila sa alinman sa tatlong haligi ng kaso, makukumbinsi sila,” dagdag niya.