TUMANGGI ang House Committee on Justice na madaliin, dumaan sa mga shortcut, o talikuran ang mandato nito sa impeachment proceedings laban kay Bise Presidente Sara Z. Duterte, sa kabila ng mga press conference, petisyon sa Korte Suprema, at reklamo sa city prosecutor.

Ginamit ni Batangas Rep. Gerville “Jinky Bitrics” Luistro, chair ng House Committee on Justice, ang kanyang pambungad na pahayag noong Mayo 4 upang ipagtanggol ang integridad ng proseso habang tinatapos ng komite ang ulat at Articles of Impeachment.

“Sinunod natin ang Konstitusyon. Hindi tayo nagmadali; hindi tayo nag-shortcut,” diin ni Luistro, na isang abogado.

“Binigyan natin ng respeto ang proseso,” dagdag niya.

Ayon kay Luistro, ang bawat hakbang ng pagdinig ay isinagawa nang maingat dahil ang komite ay humaharap sa isang prosesong konstitusyonal at sa mga paratang laban sa pangalawang pinakamataas na opisyal ng bansa.

“Bawat hakbang, bawat salita, bawat ebidensya, hinarap natin nang buong pag-iingat at pananagutan,” pahayag niya.

Nagsimula ang komite sa sufficiency in form noong Marso 2, sinundan ng sufficiency in substance noong Marso 4, sufficient grounds noong Marso 18, mga preliminary matters at subpoena noong Marso 25, at serye ng mahahabang pagdinig noong Abril 14, Abril 22, at Abril 29.

“Ang unang pagdinig natin ay noong March 2 kung saan tinukoy natin ang sufficiency in form. Sumunod ang March 4 para sa sufficiency in substance,” pagbabalik-tanaw ni Luistro.

“Kaya naman noong March 18, natukoy natin na may sapat na batayan ang mga reklamo para sa impeachment,” dagdag niya.

Ayon kay Luistro, mahahaba at mabibigat ang mga pagdinig, at may mga pagkakataong mas luminaw ang ilang sagot habang may mga bagong tanong na lumitaw.

“Sumunod ang marathon hearings noong April 14, April 22, at April 29. Doon tayo nakinig sa mga resource person,” ani Luistro.

“Narinig natin ang ebidensya. Sinuri natin ang ebidensya,” diin niya.

Inilarawan ni Luistro ang proseso bilang mabigat ngunit sinabi niyang hindi nawala ang direksyon ng komite.

“Marami tayong pinagdaanan—may mga tagumpay at hamon, at pagdaloy ng testimonya at dokumento,” aniya.

“Ngunit sa kabila ng lahat, isang bagay ang nanatiling sigurado: hindi tayo naligaw. Nanatili tayong may direksyon,” dagdag niya.

Aminado si Luistro na napagod ang mga miyembro ng komite at hinarap din ang pampublikong pressure habang may mga pag-atakeng nagmumula sa labas ng pagdinig.

“Sa paglalakbay na ito, napagod tayo. Sinubok ang ating pasensya, lalo na sa harap ng mga batikos mula sa labas,” ani Luistro.

Binanggit niya ang mga press conference ng kampo ni Duterte, mga nakabinbing petisyon sa Korte Suprema, at reklamo sa Office of the City Prosecutor bilang mga hakbang na maaaring magpabagal o makagambala sa proseso.

“Nakita natin ang mga press conference ng kampo ng Bise Presidente; nakita rin natin ang mga petisyon sa Korte Suprema at reklamo sa Office of the City Prosecutor,” ani Luistro.

“Oo, maraming hakbang ang ginawa upang pigilan ang prosesong ito, pero sa kabila ng lahat, hindi tayo natinag,” dagdag niya.

Para kay Luistro, ang naging batayan ng komite ay disiplina sa gitna ng pressure, hindi ang kawalan ng pagtutol.

“Sa huli, hindi ang kawalan ng laban ang nagtakda sa atin, kundi ang pagtanggi na maligaw, ang disiplina na manatili sa direksyon, at ang linaw ng layunin,” pahayag niya.

Ipinapaalala rin niya na ang Justice Committee ay may natatanging tungkulin sa Konstitusyon na hindi katulad ng ibang komite sa Kamara.
“Tayo ang Committee on Justice,” ani Luistro.

“Natangi ang komiteng ito dahil sa lahat ng komite sa Kongreso, tayo lamang ang tahasang binanggit at binigyan ng partikular na mandato ng Konstitusyon,” paliwanag niya.

Ayon sa kanya, kailangang gampanan ng komite ang tungkuling ito sa pamamagitan ng pagiging patas sa mga nagrereklamo, sa Bise Presidente sa ilalim ng due process, at sa mamamayang Pilipino sa pamamagitan ng pananagutan.

“Binigyan tayo ng pangalang ito para sa isang dahilan,” ani Luistro.

“Ngayon, umaasa tayong naging karapat-dapat tayo sa pangalang ito,” dagdag niya.

Inilarawan niya ang pagdinig noong Mayo 4 bilang huling hakbang ng komite bago ang paglipat ng kaso sa plenaryo.

“Ngayon, May 4, kukumpirmahin natin ang mga nangyari noong nakaraan sa pamamagitan ng Committee Report,” paliwanag niya.

“Ang ating tungkulin ay aprubahan ang mga dokumentong ito at isumite ang lahat sa Plenary,” dagdag niya.

Hinimok din niya ang komite na ituloy ang proseso hanggang sa tamang konklusyon, at sinabing hindi maaaring itago sa likod ng pagkaantala o katahimikan ang mga seryosong paratang laban sa mga opisyal ng bayan.

“Sapagkat utang natin sa susunod na henerasyon ng mga Pilipino na ipakita na walang sinuman, gaano man kalakas o kataas ang posisyon, ang nakatataas sa batas,” ani Luistro.

“Kung si Bise Presidente ay may sala, hayaan ang katotohanan ang humatol. Kung siya ay inosente, hayaan ang proseso ang maglinis sa kanyang pangalan,” pagtatapos niya