PINUNA noong Miyerkules ni Senador Panfilo “Ping” Lacson si Senate President Alan Peter Cayetano at sinabing pumapasok na sa usapin ng dereliction of duty ang nangyayari sa Senado, dahil sa halip na sa plenaryo ay sa Facebook livestream umano nito dinadala ang liderato ng kapulungan habang papalapit ang sine die adjournment.

Sa media release, sinabi ni Lacson na pasalita lamang umano ipinadaraan ni Cayetano ang mga abiso sa pagsuspinde ng sesyon at iba pang direktiba, nang walang pormal na nakasulat na notice at walang dokumentadong bakas. Aniya, taliwas ito sa tungkulin ng mga senador na gampanan ang kanilang gawaing lehislatibo.

“WHAT A MESS! Where else can we find a Senate President who boycotts the regular sessions of a chamber which he is supposed to preside, then delivers speeches on Facebook instead of the Senate floor before his peers so we can interpellate him?,” ani Lacson.

Idinagdag ni Lacson na “under attack” ang Senado hindi mula sa labas kundi mula sa “sariling liderato,” at sinabi niyang maaaring maging batayan ito ng reklamong maaaring ihain sa Senate ethics committee kung may sapat na basehan.

Muli rin siyang nanawagan sa mga miyembro ng majority bloc na dumalo sa sesyon noong Miyerkules, na tinukoy niyang huling araw ng sesyon bago ang sine die, dahil marami pa aniyang usaping dapat talakayin. Sinabi ni Lacson na kahit muling lumiban sina Cayetano at iba pang presiding officers, maaari pa ring magtalaga ng presiding officer ang mga senator na nasa floor kung may quorum upang “open the session, convene and conduct business.”

Pinasubalian din ni Lacson ang pahayag ni Cayetano na plano ng minority bloc na kontrolin ang mahahalagang komite ng Senado, at sinabing isa lamang itong dahilan upang bigyang-katwiran ang patuloy na hindi pagpasok ng majority bloc.

Nauna nang ipinaliwanag nina Cayetano at ng Senate Majority na ang withholding of quorum ay isang parliamentary move umano upang maprotektahan ang nagpapatuloy na mga imbestigasyon, lalo na ang flood control inquiry, at maiwasan ang pagbabago sa pamunuan ng mga komite habang hindi pa tiyak ang balanse ng bilang sa kapulungan.

Makikita sa session calendar ng Senado na tatagal ang kasalukuyang session period hanggang Hunyo 5, 2026, at magsisimula ang sine die adjournment sa Hunyo 6, kaya lalong umiigting ang tanong kung makababalik pa sa plenary work ang Senado bago ang break.