INIUTOS ni Acting Senate President Sherwin Gatchalian ang work-from-home arrangement sa mga empleyado ng Senado sa Hunyo 10 at 11 matapos makatanggap ang Senado ng security threat information mula kay National Bureau of Investigation Director Melvin Matibag.

Sa June 9 advisory sa lahat ng Senate offices, pinahintulutan ni Gatchalian ang lahat ng Senate Secretariat at Senate Proper employees na mag-shift sa work-from-home arrangement sa natitirang bahagi ng linggo upang maisagawa ang security assessments, inspections at iba pang precautionary measures sa Senate premises.

Nakasaad sa advisory na nananatiling pangunahing prayoridad ang safety and security ng Senate personnel habang isinasagawa ng mga kinauukulang awtoridad ang security protocols sa gusali.

Inatasan ang heads of offices na tiyakin ang tuloy-tuloy na operasyon sa pamamagitan ng remote work. Maaaring papasukin pa rin ang personnel na kailangan para sa security, safety, maintenance at iba pang essential functions.

Ang pangalan ng mga empleyadong kailangang pumasok nang personal ay dapat isumite sa Office of the Sergeant-at-Arms.

Nauna nang sinabi ni Gatchalian na ipinaalam ni Matibag sa mga kinauukulang sektor na may potensyal na banta sa Senate building at sa mga pasilidad nito.

Sinabi niya na kailangang protektahan ng kapulungan ang mga senador, empleyado at iba pang personnel habang sinusuri ng security at intelligence authorities ang reported threat.

Sinabi rin ni Senador Vicente “Tito” Sotto III na naghahanda na ng security measures matapos makatanggap ang mga senador ng impormasyon tungkol sa reported threat.

Dumating ang security concern habang hiwalay na nagbabala si Senador Panfilo “Ping” Lacson na maaaring maging usaping panseguridad ang frustration sa hanay ng armed services kung pagsasamantalahan ito ng “unscrupulous and power-hungry destabilizers.”

“As per information, though still sketchy and raw, the level of frustration within the armed services has reached up to battalion and regional levels,” ani Lacson.

Sinabi ni Lacson na kabilang sa mga binabantayang usapin ang power play sa Senado, umano’y flood-control anomalies, inflation, pagtaas ng presyo ng fuel at iba pang isyu.

Wala pang opisyal na tinukoy na partikular na grupo o indibidwal na nasa likod ng reported threat.

Inilabas ni Gatchalian ang WFH order habang nananatiling hati ang Senado sa June 3 proceedings na nagdeklara na bakante ang lahat ng leadership positions at humalal sa kanya bilang Senate President Pro Tempore. Mula noon, nagsisilbi siyang acting Senate President.

Si Senador Alan Peter Cayetano, na patuloy na kumukuwestiyon sa bisa ng June 3 proceedings, ay hiwalay na naglabas ng work advisory para sa Senate employees mula Hunyo 8 hanggang 11.

Inilagay ng kautusan ni Gatchalian ang pangunahing tuon sa kaligtasan ng mga empleyado, security checks at tuloy-tuloy na operasyon ng Senado habang bineberipika ang intelligence information.