PINAPURIHAN ni dating Surigao del Norte 2nd District Rep. Robert Ace S. Barbers ang bagong pamunuan sa Senado sa ilalim ng liderato ni Senate President Sherwin Gatchalian kasunod ang kaniyang kahilingan sa bagong mayorya ang pagpukos sa kanilang Konstitusyonal na tungkulin sa impeachment trial.

Binati din ni Barbers, dating Chairman ng House Quadrupole Committee, si Gatchalian kasama ang mga miyembro ng Senado sa pag-resolba ng kanilang mga isyu sa pamumuno at sinabing ang pagbabagong ito ay nag-aalis ng malaking hadlang sa maayos na pagpapatakbo ng paparating na impeachment trial.

“Inaasahan ng bansa na ang mga institusyon nito ay magpapatakbo nang higit sa politika, lalo na sa panahon na sinusubok ang tiwala ng publiko. Pinupuri ko ang ating mga senador sa pagsasantabi ng kanilang mga panloob na alitan at sa pagtiyak na ang Senado ay maaari nang ganap na magpukos sa mga konstitusyonal na responsibilidad nito,” sabi ni Barbers.

Ang proseso ng impeachment, sabi ng dating kongresista, ay masyadong mahalaga para maantala lamang ng mga politikal na maniobra o mga hidwaan sa pamumuno.

“Ang anumang hindi kinakailangang pagkaantala sa mga serye ng pagdinig ay hindi lamang makakaapekto sa napapanahong paggawad ng katarungan, kundi maaari ring magpahina sa tiwala ng publiko sa ating mga demokratikong institusyon. Ang mamamayang Pilipino ay karapat-dapat sa isang proseso na transparent, kapani-paniwala at tapat sa Konstitusyon,” dagdag pa nito.

Binigyang diin pa ni Barbers na ang papel ng impeachment court ay hindi para protektahan o usigin ang sinumang indibidwal, kundi para alamin ang katotohanan base lamang sa ebidensyang inihain ng magkabilang panig.

“Ngayon ang panahon para patunayan ng Senado na kaya nitong tapat na gampanan ang mandato nito, hindi para sa kapakanan ng sinumang politikal na personalidad, partido, o paksyon, kundi para lamang sa interes ng bansa. Ang lakas ng ating demokrasya ay nakasalalay sa kakayahan ng ating mga institusyon na umangat mula sa mga makapartidong interes at itaguyod ang pananaig ng batas,” wika pa ni Barbers.

Idiniin ni Barbers na ang magiging hatol sa paglilitis ay dapat gabayan ng mga katotohanan, ebidensya, at tamang proseso.

“Hindi maaaring mauna ang pulitika kaysa sa katotohanan. Ang tungkulin ng Senado ay malinaw: pakinggan ang ebidensya, sundin ang Konstitusyon, at tapusin ang proseso nang may integridad. Anuman ang maging hatol, dapat itong tanggapin ng mamamayang Pilipino bilang bunga ng isang patas, walang kinikilingan, at kapani-paniwalang pagdinig,” aniya.

To God be the Glory