HANDA ang House prosecution panel na tapusin ang impeachment trial ni Bise Presidente Sara Z. Duterte, gaano man ito katagal, ayon kay House prosecutor at Manila 3rd District Rep. Joel Chua nitong Linggo.

“Wala pong bibitiw,” sabi ni Chua sa panayam sa Bantay Balita sa Kongreso ng dzBB kasama sina Nimfa Ravelo at Isa Avendaño-Umali, nang tanungin kung handa ba ang prosekusyon sa isang paglilitis na maaaring tumagal ng pito hanggang walong buwan.

“Basta po, gagawin namin ang lahat ng aming makakaya upang maiprisinta sa ating mga kababayan at sa impeachment court ang mga ebidensya batay sa bawat artikulo,” dagdag niya.

Ang tanong ay ibinatay sa naunang pahayag ni Senate President Sherwin Gatchalian sa parehong programa ng dzBB na maaaring umabot sa pito hanggang walong buwan ang impeachment trial.

Gayunman, nilinaw ni Chua na hindi nangangahulugang ganoon nga katagal ang paglilitis kahit nagmungkahi ang prosekusyon ng 62 araw para sa presentasyon ng mga ebidensya.

“Pero hindi naman ibig sabihin noon na lahat ‘yan ay masusunod,” aniya.

Ipinaliwanag niya na ang tantiyang iyon ay nakabatay sa pagdinig ng tig-iisang testigo sa bawat hearing. Aniya, maaari pa itong lumiit kung dalawa o tatlong testigo ang ihaharap sa isang araw ng pagdinig.

Sinabi rin ni Chua na maaari ring piliin ng prosekusyon na huwag nang iharap ang lahat ng apat na Articles of Impeachment kung sa tingin nila ay sapat na ang mga naiprisintang ebidensya upang makamit ang hatol na guilty.

“Kung halimbawa, pagkatapos ng dalawang articles, sa tingin namin ay may sapat nang bilang at napakatibay na ng mga ebidensyang naiprisinta namin, maaari naming i-waive na ang iba pang articles,” aniya.

Ipinaliwanag din niya kung bakit dumami ang mga dokumentong isinumite sa panahon ng pre-trial.

Ayon kay Chua, may humigit-kumulang 4,000 acknowledgment receipts ang prosekusyon na may kaugnayan sa confidential funds. Ngunit dahil hindi pumayag ang depensa sa common marking procedure at iginiit na magkahiwalay na markahan ang parehong mga dokumento, nadoble ang bilang ng mga dokumentong kinailangang iproseso.

“Puwede naman kasi ang common marking. Ibig sabihin, sa isang dokumento, parehong maaaring maglagay ng marka ang depensa at ang prosekusyon,” paliwanag ni Chua.

“Pero dahil ayaw pumayag ng depensa at gusto nilang magkahiwalay ang marking, ang 4,000 dokumento ay naging 8,000,” dagdag niya.

Nakatakdang simulan ng Senado, bilang impeachment court, ang pormal na paglilitis sa Hulyo 6. Kakaharapin ni Duterte ang impeachment kaugnay ng mga paratang na kabilang ang umano’y maling paggamit ng confidential funds, hindi maipaliwanag na yaman, panunuhol na kinasasangkutan ng mga tauhan ng Department of Education, at mga umano’y pagbabanta laban sa pinakamataas na opisyal ng bansa.