HINDI na kailangang sumailalim sa quarantine ang mga indibidwal na darating sa bansa kahit ang mga ito ay hindi bakunado laban sa COVID-19.

Inaprubahan ni Pangulong Ferdinand Marcos Jr. ang Inter-Agency Task Force (IATF) for the Management of Emerging Infectious Diseases Resolution No. 2 na bahagi ng pagpapaluwag ng health restriction sa bansa.

Kailangan namang magpakita ng negatibong resulta ng rapid antigen test ang mga walang bakuna o partially vaccinated pa lamang laban sa COVID-19.

Ang mga dumating sa bansa na walang negatibong antigen test result ay kailangang magpa-antigen test pagdating sa airport.

Kung magpopositibo ay kailangang sumailalim sa quarantine o isolation protocols ng Department of Health.

Ang mga fully vaccinated ay kailangan namang magpakita ng vaccination card at iba pang patunay na sila ay fully vaccinated na laban sa COVID-19.