IGINAGALANG ni Senate President Sherwin Gatchalian ang pagbasura ng Korte Suprema sa petisyong kumukuwestiyon sa Hunyo 3 sesyon ng Senado. Sa sesyong iyon siya naluklok bilang presiding officer.

“We respect the Court and its resolution,” pahayag ni Gatchalian nitong Huwebes, matapos matanggap ng kanyang tanggapan ang abiso ng en banc resolution.

Ayon sa resolusyong may petsang Agosto 26 sa G.R. No. E-07032, hindi naipakita ng mga petitioner na nagkaroon ng grave abuse of discretion ang mga senador na nagdaos ng sesyon. Sa halip, ayon sa Korte, lumilitaw na ito ay “in accord with the facts and applicable law and jurisprudence.” Nilagdaan ang abiso ni Clerk of Court Marife M. Lomibao-Cuevas.

Ani Gatchalian, nagpulong ang Senado noong Hunyo 3 “in accordance with the Constitution and established jurisprudence so that the chamber would not be left unable to function.” Dagdag niya, sumunod sa mga patakaran at precedent ng Senado ang proceedings noong araw na iyon.

Inihain nina Atty. Valeriano S. Loon at Atty. Zigfred M. Diaz ang petisyon bilang mga taxpayer, officer of the court at para sa interes ng publiko.

Respondent si Gatchalian at ang 11 pang senador na dumalo sa sesyon. Sila ay sina Francis “Chiz” Escudero, Vicente “Tito” Sotto III, Juan Miguel Zubiri, Joseph Victor “JV” Ejercito, Panfilo Lacson, Erwin Tulfo, Raffy Tulfo, Paolo Benigno “Bam” Aquino IV, Francis “Kiko” Pangilinan, Risa Hontiveros at Manuel “Lito” Lapid. Kasama rin sina Senate Secretary Renato Bantug Jr. at Sergeant-at-Arms Police Maj. Gen. Alfredo Sotto Corpus.

Ayon sa mga ulat, hindi sumipot sa sesyon noong Hunyo 1 at 2 ang grupo ni noo’y Senate President Alan Peter Cayetano, kaya walang quorum. Umabot sa 12 ang dumalo noong Hunyo 3 nang sumipot si Escudero.

Batay sa desisyon ng Korte Suprema noong 1949 sa Avelino v. Cuenco, ibinilang ng grupo ang quorum mula sa 22 senador. Ayon sa mga ulat, hindi isinama si Sen. Ronald “Bato” dela Rosa, suspek ng International Criminal Court na noo’y umano’y nagtatago. Hindi rin isinama si Sen. Jinggoy Estrada, na noo’y nakakulong kaugnay ng kasong plunder.

Idineklara ng mga senador na bakante ang lahat ng elective post. Inihalal nila si Gatchalian bilang Senate President pro tempore, kaya siya ang naging acting Senate President.

Kinontra ni Cayetano ang proceedings. Ayon sa mga ulat, tinanggap din niya ang resulta noong Hunyo 17, nang mahalal si Gatchalian bilang Senate President sa isang special session.

Dumulog din sa Korte noong Hunyo si Cayetano at ang kanyang mga kaalyadong senador para ipawalang-bisa ang sesyon. Walang binanggit ang abiso tungkol sa kasong iyon.

Noong Hunyo 10, ibinasura ng Korte dahil sa kawalan ng legal standing ang petisyon ng gurong si John Barry Tayam na humihiling na ideklarang balido ang sesyon. Hindi nito tinalakay ang isyu ng quorum.