HINDI muna ipatutupad ni Valenzuela City Mayor Wes Gatchalian ang No Contact Apprehension Policy (NCAP) ng Metropolitan Manila Development Authority (MMDA) simula sa Lunes.

Ayon sa alkalde, bagama’t nauunawaan niya ang layunin ng NCAP hindi pa ito tamang panahon sa Valenzuela dahil sa maraming road construction at rehabilitasyon ng mga pangunahin nilang lansangan.

“Araw-araw po ay nagbabago ang daloy ng trapiko sa ating lungsod, ayaw nating dagdagan ang pasanin ng ating mga motorista sa panahong hindi pa normal ang kondisyon ng ating mga kalsada,” pahayag ng alkalde.

Dagdag pa ni Mayor Gatchalina, uunahin muna nila ang maayos at ligtas na daloy ng trapiko at tsaka na nila ito ipatutupad hanggang sa susunod na paglalabas nila ng abiso.