KAMPO HENERAL Malvar–Kalaboso ang sinapit noong Huwebes ng kinilalang si alyas Ronnie matapos makumpiskahan ng 10 master case ng mga sigarilyong tatak H&P na may halagang P573,000, boodle money at cellphone sa Brgy. San Felipe, Padre Garcia.

Ayon sa Bureau of Customs (BOC), humigit-kumulang sa ganong halaga ang nasamsam sa suspek.

Sinabi ni Batangas police director PCol. Oliver Ebora na bandang alas-9:10 ng gabi ikinasa ng PDEU/SOU BPPO at Padre Garcia police ang operasyon laban sa suspek.

Sasampahan ang suspek ng mga kasong paglabag sa RA 10643 o ang Graphic Health Warnings Law, RA 8424 o ang National Internal Revenue Code (NIRC).

Dinala ang naarestong suspek sa Batangas Medical Center para sa medikal na pagsusuri bago dinala sa opisina ng PDEU/SOU para sa dokumentasyon at pagsasampa ng kaukulang kaso.