AYON kay Zia Alonto Adiong, tagapagsalita ng House trial panel at kinatawan ng Lanao del Sur, ang pagpapatuloy noong Huwebes ng imbestigasyon ng Senado sa umano’y flood control scam ay isang “non-hearing” o hindi opisyal na pagdinig at, sa kanyang pananaw, ay hindi maituturing na opisyal na pagdinig ng Senado.

Sinabi ni Adiong noong Linggo na isa lamang itong pagtitipon o pagpupulong ng ilang senador.

Ayon sa kanya, ang sinasabing pagdinig ay hindi ipinatawag ng bagong pamunuan ng Senado at wala ring mga tauhan ng Senado na nagdokumento ng mga naging kaganapan. Sa naturang pagtitipon, muling iginiit ng 18 dating sundalo ang kanilang pahayag na sila umano ang naghatid ng pera sa ilang mambabatas bilang kickback mula sa mga maanomalyang o “ghost” flood control projects.

“Yung mga karakter na kailangan, kumbaga indispensable para matawag itong isang opisyal na hearing, tulad ng regular staff, mga miyembro mula sa minorya at mayorya, quorum na napakahalaga, committee secretary, at maging stenographer—wala sila roon,” ani Adiong.

Idinagdag niya na tila hindi naging bahagi ng opisyal na rekord ng Senado ang naturang pagtitipon.

“Hindi yata siya officially naging part ng official record ng Senate. Kaya kahit subukan mo itong ikonsidera batay sa kanilang mga patakaran, hindi mo talaga masasabi na nagkaroon ng hearing,” aniya.

Binanggit din ni Adiong na walang dumalong miyembro ng bagong mayorya sa Senado sa naturang pagpupulong.

“Kung sa amin lang, talagang hindi siya matatawag na hearing. Posible siguro na isa itong meeting sa pagitan ng magkakaibigan. Pero hindi ito opisyal na hearing—walang committee staff at walang opisyal na rekord sa Senado,” dagdag niya.

Ayon pa kay Adiong, nakalulungkot para sa mga dating sundalo dahil ang kanilang mga pahayag sa naturang pagtitipon ay hindi bahagi ng opisyal na rekord ng mga pagdinig ng Senado.

Sinabi rin ng lider mula sa Mindanao na umaasa siyang mareresolba agad ng mga senador ang kanilang krisis sa pamumuno para sa katatagan ng Senado bilang institusyon.

Ikinabahala niya na ang sigalot sa liderato ay nauwi sa mga personal na pag-atake at sisihan sa pagitan ng mga senador.

“Umaasa ako na maaayos ito, dahil hindi lamang personal na usapin ang nakataya rito kundi pati ang institusyon mismo. Sana ay magkaroon ng anyo ng katatagan ang Senado,” aniya.

Sinabi rin ni Adiong na umaasa siyang, anuman ang grupong manaig sa Senado, ay matutuloy pa rin ang nakaambang impeachment trial ni Vice President Sara Duterte.

Ipinaalala niya na nagawa na ng House of Representatives ang tungkulin nito sa proseso ng impeachment at inaasahan niyang gagampanan din ng Senado ang kanilang konstitusyonal na responsibilidad.

“Wala kaming ibang opsyon kundi dinggin ang reklamong inihain laban sa Bise Presidente. Sa parehong paraan, bilang bahagi ng kanilang tungkulin sa ilalim ng Konstitusyon, wala ring ibang opsyon ang Senado kundi litisin at pagpasiyahan ito,” aniya.

Sa huli, sinabi ni Adiong na bilang miyembro ng Kamara at bilang isang mamamayang Pilipino, umaasa siyang magkakaroon ng katatagan sa Senado sa mga susunod na araw.

“Bilang isang Pilipino, umaasa tayo na magkakaroon ng katatagan sa mga darating na araw diyan sa Senado,” pagtatapos niya.