SINABI ng House of Representatives na susuportahan nito ang anumang espesyal na sesyon na ipapatawag ni Pangulong Ferdinand Marcos Jr., habang ipinahayag ni Committee on Public Accounts Chair at kinatawan ng Bicol Saro Party-list na si Terry Ridon ang pag-asang makatutulong ito upang tuluyang maresolba ang usapin sa liderato ng Senado.

Ayon kay Ridon, kinakailangang magtipon ang Kongreso kung magpapatawag ng espesyal na sesyon ang Pangulo, bagama’t aniya ay mas kinakailangan ito sa Senado dahil sa mga nakabimbing usaping pambatasan.

“Wala naman pong pagtutol sa pagkakaroon ng espesyal na sesyon na ipapatawag ng Pangulo. Dahil ang Kongreso ay binubuo ng Kamara at Senado, siyempre sa bahagi namin ay kailangan din naming magtipon,” ani Ridon sa Saturday News Forum sa Dapo Restaurant sa Quezon City.

Ayon pa kay Ridon, na isa ring House prosecutor, handa ang Kamara na suportahan ang hakbang kung ito ay kinakailangan.

“Sa tingin ko, mas para talaga ito sa Senado dahil sa mga naantalang panukala sa nakalipas na ilang linggo. Kaya naman ito ay isang bagay na susuportahan ng Kamara,” dagdag niya.

Ipinahayag din ni Ridon ang pag-asa na ang isang espesyal na sesyon ay makatutulong upang malinawan at tuluyang maresolba ang mga katanungan tungkol sa liderato ng Senado.

“At sana, ito rin ang maging paraan upang tuluyan nang maresolba ang usapin sa liderato nang may katiyakan. Gusto talaga nating malaman kung ano na ba ang tunay na sitwasyon sa Senado,” aniya.

Muli ring iginiit ni Ridon na, sa pananaw ng Malacañang at ng House of Representatives, si Sherwin Gatchalian ang kinikilalang lider ng Senado.

“Sa pananaw ng Malacañang at ng Kamara, kinikilala namin ang liderato ni Senate President Pro Tempore Sherwin Gatchalian,” ani Ridon.

Sa mga nakaraang araw, nahaharap ang Senado sa mga usapin hinggil sa pamumuno nito, habang nagpapatuloy naman ang paghahanda ng House prosecution panel para sa impeachment trial ni Vice President Sara Duterte, na nakatakdang magsimula sa Hulyo 6.