BINIGYANG-DIIN ni dating Surigao del Norte Cong. Robert Ace Barbers na hindi maaaring paghiwalayin ang dalawang parusang maaaring ipataw laban kay Vice President Sara Z. Duterte sakaling mapatunayang nagkasala siya ng Senado.

Kailangang sabay na ipataw ang pagtanggal sa puwesto at ang habambuhay na pagbabawal sa paghawak ng anumang posisyon sa pamahalaan bilang isang parusa sa ilalim ng proseso ng impeachment, sabi ni Barbers.

Naglabas si Barbers ng pahayag bilang tugon sa isang senaryong pinag-uusapan na nagsasabing posibleng matanggal si Duterte sa kanyang posisyon bilang pangalawang pangulo kapag nahatulang nagkasala ngunit hindi naman siya pagbawalang habambuhay na humawak ng pampublikong tungkulin.

Sa ganitong senaryo, maaari pa ring tumakbo si Duterte sa anumang posisyon sa halalan sa 2028.

“Batay sa ating Saligang Batas, hindi po pwedeng paghiwalayin iyan. Iyan po ang kahihinatnan ng proseso ng impeachment, kung saan ang respondent ay pinaparusahan ng pagtanggal sa puwesto at habambuhay na pagbabawal sa paghawak ng pampublikong posisyon,” paliwanag ni Barbers.

Iginiit din ni Barbers na hindi maaaring gamitin ang “plea bargain” sa proseso ng impeachment.

Ang plea bargain ay isang kasunduan kung saan umamin ang isang akusado sa mas magaan na paglabag kapalit ng mas mababang parusa.

Ayon kay Barbers, walang batayan sa Konstitusyon upang isagawa ang ganitong uri ng kasunduan sa impeachment proceedings.

Iniurong ng prosekusyon ang tatlo sa apat na impeachment charge laban kay Duterte. Nagpasya rin ang pangkat na ituon ang buong pagsisikap nito sa natitirang kaso tungkol sa umano’y hindi maipaliwanag na yaman ng bise presidente.

Sa kabila ng pag-urong sa tatlong impeachment charge, maaari pa ring magpatuloy ang mga hiwalay na imbestigasyon upang matukoy kung may sapat na batayan para magsampa ng mga kasong kriminal kaugnay ng mga nasabing alegasyon.

Sa kasalukuyan, may nakabinbing kasong grave threats laban kay Duterte sa isang Regional Trial Court sa Quezon City.

Iniimbestigahan naman ng Office of the Ombudsman ang umano’y maling paggamit niya ng P612.5 milyon na confidential funds at ang alegasyon ng panunuhol sa mga opisyal ng Department of Education noong siya pa ang kalihim ng ahensya.