ISINANTABI ni House impeachment trial adviser Robert Ace Barbers ang kumakalat na balitang may kasunduan na upang magbitiw sa pwesto si Vice President Sara Duterte kapalit ng pagpapanatili ng kanyang karapatang tumakbo sa pagkapangulo sa 2028.

“Palagay ko walang basehan at katotohanan ‘yan,” pahayag ni Barbers.

Tinanggihan ni Barbers ang kaisipang dapat resolbahin sa pamamagitan ng pampulitikang tawaran ang mga pormal na akusasyon laban sa Bise Presidente.

“Malinaw na kung may pananagutan, dapat ito panagutin. ‘Di pwedeng makipag-compromise,” sabi ni Barbers.

Nang tanungin kung pwedeng paghiwalayin ang pagpapatalsik sa pwesto (removal from office) at ang diskwalipikasyon sa pagtakbo (disqualification), iginiit ni Barbers na batay sa Konstitusyon ay hindi ito maaaring paghiwalayin.

“Tingin ko hindi magugustuhan ng taumbayan ang ideya ng isang kompromiso,” dagdag pa ni Barbers.

Isinusulong ng prosecution team ang Artikulo II, na tumatalakay sa diumano’y hindi maipaliwanag na kayamanan, mga paglabag sa pagdedeklara ng ari-arian at mga ipinagbabawal na interes sa negosyo.

Magugunitang tinanggap ng Senate impeachment court noong Oktubre 13 ang pagbawi sa mga artikulong may kaugnayan sa confidential funds, suhol at grave threats.

Ayon sa tantiya ng forensic financial analyst na si Atty. Alexander Cabrera, umaabot sa humigit-kumulang P817.87 milyon ang sinasabing hindi maipaliwanag na kayamanan ni Duterte at ng kanyang asawang si Atty. Manases Carpio mula 2022 hanggang 2025.

Sa mga kasunod na pagtutuos, naipakita ring maaari itong umabot sa humigit-kumulang P1.5 bilyon batay sa mas malawak na kalkulasyon.

Ang naturang ulat sa pananalapi ay nakabatay sa mga rekord mula sa bangko, buwis, seguro at mga korporasyon, kasama na ang mismong nakasulat sa Sworn Statement of Assets, Liabilities, and Net Worth (SALN) ng Bise Presidente.

Nakatakdang magsimula ang defense team sa paghaharap ng kanilang mga ebidensya sa Nobyembre 9.

Inihayag ni Barbers na naisumite na ng prosecution ang kanilang formal offer of evidence, kaya’t nasa yugto na ang kaso kung saan maaari nang magbigay ng komento ang panig ng depensa sa mga rekord na nais ipasok ng prosecutors sa hukuman.

“Kung may nilabag na batas, kailangan na ikaw maging accountable,” ayon kay Barbers.