TODAS ang 6-anyos na batang lalaki na may kapansanan at ang kanyang 43-anyos na ina nang pagpapaluin sa ulo ng umano’y drug addict na nakatakas matapos mapatay ang mag-ina sa Valenzuela City noong Nov. 19.

Hindi nahuli ang suspek na si Michael Francisco dahil nakatakas na kahit nakaburol pa ang ama sa Bulacan, ayon sa report.

Natuklasan ang bangkay ng bata at ina niyang si alyas Janice Joy ng 18-anyos na anak na babae dakong alas-8:30 ng gabi sa bahay nila sa Little Pampanga Ext. Bukid, Brgy. Balangkas nang umuwi galing sa paaralan.

Napagalaman na nagtungo ang mag-ina sa bahay ng isang alyas Ronald sa kalapit lang na lugar dakong alas-8:00 ng umaga upang pakiusapang isangla sa Meycauayan City ang kanyang kwintas at muling bumalik makaraan ang dalawang oras upang kunin ang salaping pinagsanlaan ng alahas.

Sinabi sa mga pulis ni Ronald na nakiusap sa kanya ang ginang na mananatili muna sa kanila dahil nangangamba siya sa ikinikilos ng suspek na si Francisco na una ng nagtungo sa kanilang bahay at puwersahan siyang pinagamit ng shabu.

Pinayagan naman ni Ronald ang mag-ina subalit nang pagbalik niya matapos umalis para bumili ng pagkain, wala na ang mag-ina at nabalitaan na lamang niya na napatay na ang mga ito.

Kinumpirma naman ng 13-anyos na isa pang lalaking anak ng biktima na si alyas Jelo na nagtungo sa kanilang bahay ang suspek at hinahanap ang kanyang ina.

Nang dumating na ang kanyang ina, kasama ang nakababata niyang kapatid, umalis na siya para pumasok sa paaralan at iniwan na naroon pa ang suspek.

Sa pagsusuri sa nakakabit na CCTV sa lugar, nakita ang suspek na sinusundan ang mag-ina nang magtungo sa bahay ni alyas Ronald at muli siyang nakitang sumusunod nang pauwi na sa bahay ang mga biktima.

Lumabas naman sa autopsy report ng pulisya na mga palo ng matigas na bagay sa ulo ang ikinasawi ng mga biktima habang inaalam pa ang tunay na motibo ng suspek sa pagpatay sa mag-ina.