ISANG 28-anyos na babae ang naaresto ng mga ahente ng Ninoy Aquino International Airport–Inter-Agency Drug Interdiction Task Group noong Lunes kaugnay ng tangkang pagpupuslit ng tinatayang isang kilong shabu na nagkakahalaga ng P6.8 milyon mula Ontario, Canada, ayon sa ulat ng Philippine Drug Enforcement Agency (PDEA) nitong Martes.

Ayon kay PDEA Director General, Undersecretary Isagani R. Nerez, kinilala ang suspek sa alyas na “Ruth,” na inaresto matapos subukang kunin ang isang parsela na naglalaman ng malaking halaga ng ipinagbabawal na gamot.

Idineklara ang parsela bilang naglalaman ng “ladies’ wear and bags” mula Ontario, Canada, at nakapangalan kay “Ruth” bilang consignee.

Ayon sa suspek, hindi raw niya alam na ang laman ng parsela ay shabu, na tinatawag ding “poor man’s cocaine.”

Nang inspeksyunin, nadiskubreng ang parsela ay naglalaman ng mga self-sealing transparent plastic packs na nakabalot sa aluminum foil at cling wrap, na tumitimbang ng humigit-kumulang 1,000 gramo.

Nakuha rin mula sa pag-iingat ng suspek ang kaniyang mobile phone, isang notice card at ilang identification cards—kabilang ang isa na nakapangalan sa consignee at iba pa na peke at may iba’t ibang pagkakakilanlan.

Kasalukuyang nasa kustodiya na ng PDEA ang suspek at nahaharap siya sa kasong hindi pinapayagang piyansahan sa ilalim ng Republic Act No. 9165 o ang Comprehensive Dangerous Drugs Act of 2002.