MARAGONDON, Cavite–Todas ang barangay captain ng Brgy. Tulay A, Maragondon, Cavite nang barilin noong Sabado.

Kinilala ni Major Cris Mangupay, hepe ng Maragondon police, ang biktima na si Rodrigo Tanagras, alyas Rod, 53, Brgy. captain ng Tulay A.

Binaril ang biktima habang tinutulungan ang mga barangay health workers na magputol ng damo sa barangay road.

Dalawang lalaking suspek ang sumulpot sakay ng Honda Click at sa hindi malamang dahilan biglang binaril ang biktima ng ilang beses at tumakas patungo sa hindi malamang direksyon.

Isinugod ang biktima sa San Lorenzo Ruiz Hospital sa Naic, Cavite ngunit idineklara itong dead-on-arrival ng attending physician na si Dr. Glenerson Ontiveros bandang alas-8:00 ng umaga.

Retiradong pulis ang biktima bago naging barangay captain, ayon sa mga saksi.