INIHAYAG ng Bureau of Immigration (BI) na ipatutupad nito ang bagong patakaran mula sa pamahalaan na magpapalawak sa mga kategorya ng mga dayuhang pinahihintulutang makapasok sa bansa.

Sinabi ni BI Commissioner Jaime Morente na batay sa kamakailang resolusyon ng Inter-Agency Task Force for the Management of Emerging Infectious Diseases (IATF), lahat ng mga dayuhan na ganap na nabakunahan ay nakakapasok na sa Pilipinas simula noong Pebrero 10.

Gayunpaman, nilinaw ni Morente na ang mga mamamayan mula sa 157 na bansang nakalista sa ilalim ng Executive No. 408 na inamyendahan at ang iba pang nasyonalidad na sakop ng mga nauugnay na Foreign Service Circulars ay maaaring payagang makapasok sa bansa nang walang visa, habang ang mga nangangailangan ng visa ay kailangang makakuha ng entry visa at Entry Exemption Document (EED) mula sa pinakamalapit na konsulado o embahada ng Pilipinas.

Ang mga darating na ganap na nabakunahan na mga dayuhan ay kailangang magpakita ng patunay na sila ay nabakunahan at naaprubahan ng IATF, isang negatibong resulta ng RT-PCR na may bisa sa loob ng 48 oras bago umalis sa bansang pinagmulan, at isang travel insurance para sa Covid-19, na may minimum na saklaw na USD 35k, balido para sa tagal ng kanilang pananatili sa bansa, na ipapakita sa mga airline sa pag-check-in.

Ang mga darating na turista ay kinakailangang magkaroon ng pasaporte na may bisa ng hindi bababa sa 6 na buwan at isang ticket na papalabas ng bansa.

Nakasaad sa resolusyon ng IATF na ang mga hindi makumpirmang patunay ng pagbabakuna ay sasailalim sa facility-based quarantine hanggang sa mailabas ang kanilang negatibong RT-PCR test na kinuha sa ikalimang araw.

Nilinaw ni Morente na ang mga hindi nabakunahang dayuhan, anuman ang uri ng visa, ay hindi papayagang makapasok.

“Ayon sa direksyon ng IATF, ang mga dayuhan na hindi nabakunahan at bahagyang nabakunahan ay hindi papayagang makapasok,” sabi ni Morente. “Ang mga ganap na nabakunahan lamang ang maaaring tanggapin,” dagdag niya.

Sinabi ni Morente na ang mga dayuhang hindi nabakunahan at ang mga hindi makapagpakita ng mga kinakailangang dokumento ay hindi kasama at sasakay sa susunod na flight pabalik sa kanilang pinanggalingan. Hinimok niya ang mga airline na magsakay lamang ng mga karapat-dapat na dayuhang mamamayan, at nagbabala na ang mga sasakay na mga hindi kwalipikadong dayuhan ay sasailalim sa mga multa at parusa.