GUIGUINTO, Bulacan–Natangay ang isang 9mm pistol, iba’t-ibang identification cards, ATM, P37,000 cash at cellphone sa sasakyan na binasag ang salamin sa bayang ito.

Iniimbestigahan ng pulisya ang insidente na itinuturing na kagagawan ng basag-kotse gang sa parking area ng Puregold-Guiguinto.

Kinilala ng Bulacan police ang biktima na si Dominador Lopez III, 34, airport police officer.

Sa imbestigasyon ng Guiguinto police, dumating si Lopez sa supermarket at ipinarada ang kanyang Chevrolet Colorado (NEP 5125) sa itinalagang parking area bago pumasok sa establisyemento.

Pagbalik niya makalipas ang isang oras, nadiskubre niyang basag na ang kanang unahang bintana ng kanyang sasakyan at nawawala na ang mga nabanggit na valuables.