CABANATUAN CITY–Gumagamit ang SM City-Cabanatuan ng solar power na may katumbas na capacity na 1,960 kilowatt-peak (kWp) na nakakabit sa rooftop ng mall.

“Ang solar upgrade na ito ay hindi lamang nakakatipid ng enerhiya, nakakatulong din itong protektahan ang planeta bawat taon sa pamamagitan ng pagbabawas ng carbon emissions ng 243.6 tonelada, katumbas ng pag-alis ng dose-dosenang mga sasakyan sa kalsada,” pahayag ng mall.

Epektibo ang solar sa 10,750 metro kuwadradong rooftop na katumbas ng 4,468 solar photovoltaic (PV) system na halos kasinglaki ng isa’t kalahating football field.

“Ang solar power system ay maaari ring magbigay ng kuryente na katumbas ng 1,114 na kabahayan at mapawi ang polusyon katumbas ng pagtatanim ng 11,181 na puno,” sabi ni Sheree Anne Eugenio, PR officer ng SM City Cabanatuan.

Ang pag-upgrade ng solar power ng mall ay bahagi ng pagsisikap ng SM Prime Holdings na bumuo ng mga eco-friendly at energy-efficient na mall sa buong bansa.

Sa pamamagitan ng pamumuhunan sa solar energy, nakakatulong ang SM na labanan ang pagbabago ng klima habang pinapanatiling maliwanag, malamig at kaaya-aya ang mga mall nito para sa mga mamimili.

Sa pamamagitan ng proyektong solar na ito, pinatutunayan ng SM City Cabanatuan na ang pag-unlad ay hindi kailangang isakripisyo ang kapaligiran.