Ukol sa pagkamatay ng 3 miyembro ng Valle Verde Gang

PINAGTIBAY ng Court of Appeals (CA) Third Division ang desisyon ng Pasig City Regional Trial Court Branch 265 na pabor sa depensa ng grupo ni Colonel Hansel M. Marantan, kasalukuyang director ng Davao City Police Office, na napatay nila ang tatlong hinihinalang miyembro ng tinaguriang ‘Valle Verde Gang’ sa isang lehitimong police operation noong Nobyembre 7, 2005.

Sa desisyon na inilabas nitong Setyembre 16, 2024, sinabi ni Associate Justice Maximo M. De Leon na “Sa kabuuan, wala kaming nakitang sapat na dahilan upang baliktarin ang hatol ng trial court.”

“Wherefore, premises considered, the Appeal is DENIED. The Orders dated 23 July 2020 and 04 February 2021 of the Regional Trial Court, Branch 265, Pasig City are AFFIRMED IN TOTO,” ayon sa desisyon na sinang-ayunan nina Associate Justices Ramon M. Bato Jr. at Gabriel T. Robeniol.

Matapos ang muling pag-aaral ng mga rekord, pinagtibay ng CA ang hatol ng trial court na ang mga reklamo ng mga private complainant ukol sa civil indemnity, pagkawala ng kakayahang kumita, at mga danyos ay dapat ibasura dahil sa kakulangan ng legal at aktwal na basehan.

Ayon sa mga associate justice ng CA, “after review of the records, we sustain the trial court’s finding that the private complainant-appellants’ claims of civil indemnity, loss of earning capacity and damages should be dismissed for lack of legal and factual basis.”

Dagdag pa rito, “it is unequivocal that the trial court granted the Demurrer to Evidence of the defendants-appellees for failure of the prosecution to prove the identity of the perpetrators. The court held that even if the commission of the crime can be established, there can be no conviction without proof of the identity of the criminal beyond reasonable doubt.”

Dahil dito, ayon sa nature of the acquittal of the defendants-appellees, ang kanilang civil liability ay ituturing na wala rin. Ang civil liability ex delicto ay nagmumula sa parehong kilos o pagkukulang na bumubuo ng krimen, kaya’t kung walang delict, hindi maaaring magkaroon ng civil liability ex delicto. Ang desisyon ng CA ay nagpapatunay sa ganitong prinsipyo.

Nag-apela ang mga abogado ng mga nasawing suspek na baliktarin ng CA ang desisyon ng Pasig RTC Branch 265, ngunit pinanindigan ng appellate court ang naunang desisyon. Noong Hulyo 23, 2020, naglabas ang trial court ng kautusan na ipinagkakaloob ang Demurrer to Evidence na isinampa ng mga abogado ni Marantan at iba pa, batay sa kakulangan ng positibong pagkakakilanlan ng mga akusado mula sa mga saksi ng prosekusyon.

Tinukoy rin ng CA na inadmissible at incompetent ang mga affidavit, forensic case review, at resolusyon ng Commission on Human Rights dahil sa pagiging hearsay. Hindi rin tinanggap ng korte ang Forensic Case Review ni Dr. Raquel Fortun dahil hindi siya isang certified Forensic Pathologist o crime scene investigator. Dagdag pa rito, tinukoy ng CA na walang probative value ang CD ng umano’y raw footage ng pamamaril dahil hindi ito na-authenticate.

Binigyang-diin ng desisyon ng CA na ang mga private complainants ay hindi maaaring mag-apela ng criminal aspect ng kaso, kundi tanging ang civil aspect lamang. Ang Estado, sa pamamagitan ng Office of the Solicitor General (OSG), lamang ang maaaring mag-apela ukol sa criminal aspect ng kaso.

Noong Nobyembre 7, 2005, sina Senior Inspectors Marantan at Samson Belmonte, at mga Police Officers Rizalito Ramos, Lloyd Soria, at Dexter Bernadas ay sinampahan ng tatlong bilang ng homicide kaugnay sa pagkamatay nina Anton Cu-Unjieng, Francis Xavier Manzano, at Brian Anthony Dulay, na pinaghihinalaang miyembro ng Valle Verde Carjacking Group.

Naganap ang engkwentro sa Ortigas Center, Pasig City bandang 10:40 ng gabi, at narekober mula sa mga nasawing suspek ang ilang matataas na kalibre ng armas at mga bala.

Mariing itinanggi ng mga akusado ang pagkakasangkot sa rubout at sinabi nilang hinahabol nila ang mga suspek na sangkot sa pagnanakaw ng mamahaling sasakyan sa Ortigas at Quezon City.

Naging kontrobersyal ang kaso matapos magreklamo ang mga pamilya ng mga biktima na ito’y isang rubout at nang isang TV station ay maglabas ng video footage ng insidente.