NAGLABAS ng Notice to Airmen (NOTAM) ang Civil Aviation Authority of the Philippines (CAAP) sa Bicol International Airport (BIA) matapos manatili sa lupa ang dalawang komersyal na eroplano dahil sa kinakailangang teknikal na inspeksyon at maintenance.

Isang eroplano ng Cebu Pacific ang nakaparada sa Bay 1 mula pa noong Setyembre 3, 2025, habang isinasagawa ang masusing inspeksyon na inirekomenda ng manufacturer upang matiyak ang patuloy na ligtas na operasyon. Isa pang eroplano na nagkaroon ng teknikal na aberya noong Setyembre 6, 2025, ay inilipat na sa Taxiway B upang maibsan ang pagsisikip sa runway.

Ang NOTAM ay epektibo mula 12:06 n.g. ng Setyembre 7, 2025 hanggang 8:00 n.g. ng Setyembre 9, 2025.

Bilang tugon sa direktiba ni Pangulong Ferdinand Marcos Jr. at pansamantalang Kalihim ng Transportasyon Giovanni Lopez, inatasan ni CAAP Director General retiradong Lt. Gen. Raul Del Rosario ang pamunuan ng BIA na agad na ipatupad ang mga hakbang upang mabawasan ang abala sa mga pasahero, mapabuti ang kapasidad sa paghawak ng mga flight, at mapanatili ang kaligtasan bilang pangunahing prayoridad.

Patuloy ang koordinasyon ng Department of Transportation at CAAP sa mga airline operators upang mapanatili ang maayos na operasyon ng paliparan, maiwasan ang pagkaantala, at matiyak ang ligtas at napapanahong paggalaw ng lahat ng flight.