PNP MULING NAGPAALALA SA PUBLIKO: WALANG NAKAKATUWANG BOMB JOKE

MULING nagpaalala ang Philippine National Police (PNP) nitong Huwebes sa publiko, partikular sa mga estudyante at kabataan, na seryosohin ang mga security protocol matapos ilagay sa kustodiya ng pulisya ang isang 20-anyos na college student dahil sa umano’y pagbibiro tungkol sa bomba sa isang school campus sa Argao, Cebu.

Nangyari ang insidente noong Martes sa Cebu Technological University–Argao Campus nang makarinig ang isang security guard na nagsasagawa ng regular na inspeksyon ng mga bag ng estudyante na nagsabi itong tila may bomba sa loob ng kanyang bag.

Sa isinagawang pagsusuri, walang nakitang pampasabog o anumang ipinagbabawal na bagay sa kanyang bag.

Ang estudyante, na kinilala lamang sa alyas na “Clark,” ay dinala sa kustodiya ng Argao Municipal Police Station at nahaharap ngayon sa kaukulang proseso dahil sa paglabag sa Presidential Decree No. 1727, o ang Anti-Bomb Joke Law.

Sinabi ni PNP chief General Jose Melencio C. Nartatez Jr. na ang mga security measure sa mga paaralan at iba pang pampublikong lugar ay inilagay upang makatulong na maiwasan ang mga banta at mapanatiling ligtas ang mga tao, kaya dapat itong seryosohin at sundin nang responsable.

“Kahit biro lamang ang intensyon, ang isang pahayag tungkol sa bomba ay maaaring magdulot ng takot at makagambala sa normal na gawain ng isang buong komunidad. Dapat nating pag-isipan ang ating mga sinasabi, lalo na sa mga lugar kung saan inaasahan ng mga tao na sila ay ligtas. Hindi sulit ang simpleng biro kung magdudulot lamang ito ng hindi kinakailangang pangamba,” ani ng hepe ng PNP.

Dagdag pa niya, patuloy na makikipagtulungan ang PNP sa mga paaralan, security personnel, lokal na awtoridad, at iba pang stakeholder upang mapanatili ang ligtas na learning environment habang iginagalang ang mga karapatan ng lahat ng sangkot.

Ayon sa PNP, binibigyang-diin din ng insidente ang kahalagahan ng pakikipagtulungan at pagsunod sa mga itinakdang security procedure, partikular sa mga paaralan kung saan nagsasama-sama ang mga estudyante, guro, personnel, at mga bisita.

Kaakibat ito ng PNP Focused Agenda, partikular ang Enhanced Managing Police Operations, na nagbibigay-diin sa maagap at preventive na pagkilos ng pulisya bilang suporta sa kaligtasan ng publiko.

Hinimok din ng PNP ang publiko na iwasang gumawa, magpakalat, o magbahagi ng mga hindi beripikadong banta tungkol sa bomba o mga katulad na pahayag na maaaring magdulot ng hindi kinakailangang pangamba.

Sa ilalim ng PD 1727, maaaring magkaroon ng legal na pananagutan ang sinumang gagawa ng bomb joke o maling banta tungkol sa bomba.