PINURI ni Speaker Ferdinand Martin G. Romualdez si Pangulong Ferdinand “Bongbong” R. Marcos Jr. sa paglagda nito sa isang batas na nag-aamyenda sa National Internal Revenue Code nitong Lunes.

Ang bagong batas ay nag-aamyenda sa Corporate Recovery and Tax Incentives for Enterprises (CREATE) Act na tatawagin ng CREATE MORE (Maximize Opportunities for Reinvigorating the Economy) Law.

Ayon kay Speaker Romualdez, isa sa mga pangunahing may-akda ng bagong batas, ang CREATE MORE Act ay naglalayong ayusin ang mga kalituhan at hindi pagkakaunawaan tungkol sa mga insentibo sa buwis na ibinigay ng CREATE law sa mga lokal at pambansang korporasyon mula nang ito ay maipasa noong Marso 2021.

Sinabi niya na ang pangunahing katangian ng orihinal na batas ay ang pagbaba ng corporate income tax mula 25 porsyento hanggang 20 porsyento, alinsunod sa global trends.

Subalit, bagamat tatlong taon pa lamang ang batas, may mga reklamo mula sa ilang mamumuhunan tungkol sa umano’y hindi malinaw na mga probisyon, lalo na ang mga insentibo sa value-added tax.

“To resolve these issues, and to encourage these investors to remain in the country and keep their workers employed, we found it necessary to already amend the law,” dagdag pa nito.

Iginiit pa ng pinuno ng Kamara na binubuo ng higit sa 300-mga kinatawan, na layunin ng mga pagbabagong ito ay naglalayong makaakit din ng mas maraming banyagang mamumuhunan.

“We acted fast to make adjustments in the law to preserve existing investments and to attract additional capital,” ayon kay Speaker Romualdez.

Binanggit niya na ang CREATE MORE Law ay nagsasama ng mga input na nakuha mula sa mga kamakailang investment missions ni Pangulong Marcos Jr. sa ibang bansa “sa pamamagitan ng pagdagdag ng mga deductions sa kita sa buwis at pagpapadali ng mga proseso kaugnay ng VAT.”

Binigyang-diin niya na inaasahan na ang mga foreign trips ng Pangulo ay magbubunga ng higit sa P1 trilyong halaga ng mga pamumuhunan.

Sinabi ng lider ng Kamara na ang mga pagbabago sa CREATE law ay hindi nagbabalik sa mga benepisyo mula sa pagbaba ng corporate income tax at ang pagbibigay ng iba pang mga insentibo sa buwis.

Ayon sa kanya, isa sa mga reklamo ng mga mamumuhunan ay may mga hindi pagkakaayon sa orihinal na batas at sa mga ipinapatupad na mga patakaran at regulasyon (IRRs).

Sinabi niya na ang mga insentibo sa VAT na inilaan para sa mga rehistradong negosyo, kabilang ang mga locators sa economic zone, mga exporter, at mga lokal na negosyo na itinuturing na “preferred industries,” ay ibinigay lamang sa mga rehistradong export enterprises batay sa mga IRRs.

Dagdag pa niya, ang CREATE MORE Act ay naglilinaw sa kalituhan ukol sa probisyong ito at nag-aayos ng iba pang mga isyu sa pagpapatupad ng orihinal na batas.

“We hope the changes will satisfy our existing investors and entice more foreign capitalists to invest in the country. The enactment of the new law signals our unwavering commitment to keep and attract investments that will preserve jobs and create more opportunities for our people,” giit pa ni Speaker Romualdez.