NANAWAGAN si Senate Minority Leader Alan Peter Cayetano sa pamahalaan na sabay na palawakin ang cruise tourism at pagbutihin ang imprastraktura sa mga lalawigan, upang mabawasan ang pagdagsa ng tao sa Metro Manila at mapalawak ang kabuhayan sa labas ng kabisera.

Sa pagdinig ng badyet ng Department of Transportation (DOTr), sinabi ni Cayetano na dapat samantalahin ng bansa ang cruise tourism at konektadong transportasyon bilang paraan upang lumikha ng trabaho at kita sa mga rehiyon. Aniya, kung magiging maayos ang mga kalsada, paliparan, at pantalan sa mga probinsya, hindi na kailangang lumuwas ang mga manggagawa sa Maynila.

“Para sa bawat dalawa o tatlong turista, isang trabaho para sa Pilipino ang nalilikha… dumadami pa ito,” pahayag ni Cayetano, habang binanggit ang mga hanapbuhay na nalilikha ng mga pantalan, transportasyon, at turismo.

Tinukoy niya ang mga pantalan sa Ilocos (Currimao at Salomague), Puerto Princesa, Cebu, at Subic bilang mga lugar na maaaring pagtulungan ng DOTr at ng pribadong sektor upang makabuo ng mga “tourism circuit” sa iba’t ibang rehiyon. Sang-ayon naman si Senador JV Ejercito, na pinuno ng Senate Committee on Tourism, at sinabing kayang tumanggap ng mas maraming barko ang mga pantalan na ito kung lalagyan ng karagdagang pasilidad.

“Posible po, Your Honor,” ayon kay Ejercito. “Karamihan sa mga pantalan, kailangan lang ng mga terminal at pasaherong pasilidad.”

Binigyang-diin ni Cayetano na ang layunin ay hindi lamang ang pagpapalago ng turismo kundi ang balanseng pag-unlad ng bansa. Binalaan niya na ang patuloy na pagtutok sa Metro Manila ay nagdudulot ng sobrang pagsisiksikan at kawalan ng oportunidad sa mga probinsya.

“Kung patuloy tayong magtatayo sa iisang lugar, doon pa rin lilipat ang mga tao,” ani Cayetano. “Nakalimutan natin ang aral ng rural development — na ang kaunlaran ay hindi kailangang mangahulugan ng pag-alis sa sariling bayan.”

Ikinumpara rin niya ang kalagayan ng mga probinsya sa Pilipinas sa mga rural area ng Europa, na aniya’y nananatiling maunlad dahil may maayos na kalsada, eskwelahan, internet, ospital, at transportasyon tulad ng sa mga lungsod. “Sa kanila, pag sinabi mong rural, maayos at konektado. Sa atin, madalas ay mahirap at mapag-iiwanan,” wika niya.

Ipinaliwanag ng senador na ang kakulangan sa mga pasilidad sa probinsya ang pumipigil sa mga mamumuhunan at manggagawa na manatili roon. Dahil dito, patuloy na umaasa ang milyon-milyong Pilipino sa mga oportunidad sa Maynila.

Hinimok ni Cayetano ang DOTr at ang Department of Tourism na pag-isahin ang plano para sa pagbangon ng mga lalawigan, sabay bigyang-prayoridad ang pantay na imprastraktura. “Ang pinakamagandang paraan upang makalikha ng trabaho,” aniya, “ay hindi lamang magtayo sa kabisera kundi ikonekta ang buong bansa.”

Sumang-ayon naman si Ejercito at sinabing ang pagpapalawak ng mga paliparang kayang tumanggap ng night flights ay makatutulong upang madala ang mga turista sa mga lalawigan. Aniya, isinasagawa na ang mga upgrade sa Zamboanga, Bohol, at Alaminos, Pangasinan upang maihanda ang mga ito bilang regional tourism hubs.

Sa pagtatapos, binigyang-diin ni Cayetano na hindi dapat sukatin ang kaunlaran batay lamang sa malalaking proyekto sa Metro Manila tulad ng subway.

“Kung nandiyan ang imprastraktura, madali na ang trabaho,” aniya. “Pero kung sa iisang lugar lang tayo magtatayo, paikot-ikot lang din tayo.”