Calendar
DA sec pina-blacklist mga kompanyang nagpuslit ng asukal
INUTUSAN ni Agriculture Secretary Francisco Tiu Laurel Jr. ang Sugar Regulatory Administration (SRA) na i-blacklist ang mga rehistradong sugar traders at importers dahil sa umano’y pagpupuslit ng mga asukal mula sa Thailand at Vietnam.
Inilabas ang kautusan matapos inspeksyunin nina Tiu Laurel, Bureau of Customs Commissioner Bienvenido Rubio at SRA chief executive officer and administrator Pablo Azcona ang mga kontrabando na dumating sa Port of Manila noong Abril.
“We cannot let these illicit trading practices undermine the agriculture sector and hurt our farmers, particularly those in the sugar industry. I congratulate the BOC for a job well done for this,” ani Tiu Laurel.
Umaabot sa halagang P9 milyon ang nakumpiskang 2,000 na tig-50-kilos bag ng refined sugar na nakasakay sa apat na container van.
Dumating noong April 29 ang shipment mula sa port of Thailand na naglalaman ng dalawang container van ng refined sugar.
Walang kaukulang permit o import allocation mula sa SRA ang naturang importer. Wala rin itong clearance para mag-release ng imported sugar, ayon sa kalihim.
Samantala, ang dalawang container van na dumating noong Enero mula Vietnam na naglalaman ng refined sugar idineklarang sweetener mix na mas may mababang taripa.
Ayon kay Tiu Laurel, kapag nakalusot sa BOC ang naturang kontrabando, mapagkakaitan ang pamahalaan ng P1.8 milyon sa import tax.
“The closer coordination among government agencies to clamp down on smuggling as well as the implementation of the Anti-Agricultural Economic Sabotage Law which doesn’t allow bail should put fear on these illicit traders,” dagdag pa ni Tiu Laurel.
Bukod sa refined sugar, nakumpiska rin ang BOC ng mga smuggled na sigarilyo na maaaring makaapekto sa kita ng mga tobacco farmers.
Sa pamamagitan ng Inspectorate and Enforcement office ng DA, nakakumpiska na ito noong 2024 ng P2.83 billion na halaga ng smuggled farm goods ang pamahalaan.
Mula Enero hanggang Mayo 19, 2025, nakakumpiska na at kinondena ng smuggled farm good na may kabuuang halaga na P407.6 milyon.
