SINUSURI ng Embahada ng Pilipinas sa Berne kung may mga Pilipinong kabilang sa mga nasawi sa nakamamatay na sunog na tumupok sa isang bar sa ski resort sa Switzerland, ayon sa Department of Foreign Affairs (DFA) nitong Sabado.

“Ang Department of Foreign Affairs, sa pamamagitan ng Embahada ng Pilipinas sa Berne, ay mahigpit na binabantayan ang mga kaganapan at nakikipag-ugnayan sa mga awtoridad ng Switzerland upang beripikahin kung may mga Pilipinong apektado,” pahayag nito.

“Handa ang Embahada ng Pilipinas sa Berne na tumulong sa sinumang Pilipinong maaaring naapektuhan ng sunog.”

Hinihikayat ang mga Pilipinong naapektuhan ng insidente na makipag-ugnayan sa embahada sa pamamagitan ng bernepe.atn@dfa.gov.ph o sa Assistance-to-Nationals hotline nito na +41791234567.

Samantala, ipinaabot ng ahensya ang pakikiramay ng Pamahalaan ng Pilipinas sa Switzerland at sa mamamayan nito kaugnay ng trahedya.

Hindi bababa sa 40 katao ang iniulat na nasawi nang lamunin ng apoy ang isang bar na punô ng mga kabataan sa isang kilalang Alpine ski resort sa Crans-Montana noong Araw ng Bagong Taon.

Isinasagawa pa ang imbestigasyon, ngunit ayon sa mga opisyal na sinipi sa mga lokal na ulat, posibleng ang mga sparkler na nakakabit sa mga bote ng champagne na napalapit sa kisame ang naging sanhi ng sunog.