NAREKOBER ng mga tauhan ng Quezon City Police District (QCPD) ang sasakyang ginamit sa pananambang sa photojournalist sa Quezon City.

Ayon kay QCPD chief Police Brigadier General Nicolas Torre III, ang silver na Toyota Vios car na may plakang NFE 5678 ay nahanap sa Purok 4, Brgy. San Anton, San Leonardo, Nueva Ecija.

Isang concerned citizen umano ang tumimbre sa mga tauhan ng Criminal Investigation and Detection Unit (CIDU) kaugnay ng kinaroroonan ng sasakyan.

Ginamit umano ang sasakyan sa pagtakas ng mga bumaril sa sasakyan ni Joshua Abiad, photojournalist ng pahayagang Remate noong Hunyo 29 sa kanto ng Corumi St., at Gasan St., sa Brgy. Masambong, Quezon City.