MAHIGIT P16.1 milyong halaga ng marijuana ang nakumpiska ng mga awtoridad sa loob ng Clark Freeport Zone sa Pampanga kamakailan.

Nakuha ng mga tauhan ng Clark Drug Interdiction Task Group ang 23 plastic bags ng high grade marijuana na tumitimbang ng 10.406 kilos at nagkakahalaga ng P16,168,900.

Nakalagay ang marijuana sa dalawang wooden crates at idineklarang ‘sofa’ o upuan mula sa Bangkok, Thailand.

Nang idaan sa x-ray ng Bureau of Customs, nadiskubreng may lamang marijuana ang mga ito.

Dinala ang kontrabanto sa laboratoryo ng PDEA para sa kaukulang pagsisiyasat.

Sasampahan ng kasong paglabag sa RA 9165 (Comprehensive Dangerous Drugs Act of 2002) ang consignee na mula sa Hermosa , Bataan.