HINILING ng National Bureau of Investigation (NBI) sa Kongreso na magpasa ng batas na magbibigay sa mga awtoridad ng malinaw na legal na batayan upang subaybayan at habulin ang mga troll farm sa social media, mga pekeng account, at AI-generated content na ginagamit upang linlangin ang publiko.

Sinabi ni Melvin Matibag sa Saturday News Forum sa Dapo Restaurant na bagama’t may umiiral nang mga batas laban sa cybercrime tulad ng mga scam, wala pa ring tiyak na legal na basehan ang gobyerno upang tugisin ang organisadong operasyon ng mga troll farm.

“Marahil ay magpo-propose kami ng panukalang batas upang gawing legal ang pagmo-monitor nito dahil wala tayong specific na batas. Palagi nating naririnig ang tungkol sa troll farms, pero wala kaming legal basis o legal cover para habulin ang mga ito,” dagdag pa niya.

Lumabas ang pahayag na ito sa gitna ng lumalaking pangamba sa paggamit ng mga pekeng account, koordinadong kilos sa social media, at artificial intelligence upang magpakalat ng maling o mapanlinlang na impormasyon, lalo na sa panahon ng matitinding usaping pampulitika.

Ayon kay Matibag, nakakapagpatanggal na ang NBI ng mga pekeng account sa pamamagitan ng koordinasyon sa Meta, ngunit makatutulong ang isang mas malinaw na batas upang masugpo ang mga network ng troll farm na hindi lamang nakasentro sa iisang fake profile.

“Kailangan itong ma-regulate kahit paano. Sa katunayan, marami na kaming naipapatanggal na fake accounts. Hindi lang namin ito ibinabalita, pero araw-araw namin itong ginagawa. May koordinasyon na kami sa META at napaka-supportive nila,” dagdag niya.

Sinabi rin ni Matibag na mahigit 2,000 pekeng account na ang naipatanggal mula nang siya ay maupo sa puwesto, at ang ilan sa mga nasa likod nito ay nahaharap na sa kaso habang ang iba naman ay iniimbestigahan pa.

“Mula nang dumating ako sa bureau, sa tingin ko ay nakapagpatanggal na kami ng mahigit 2,000 account na walang totoong identity o personalidad. Ang ilan sa kanila ay may kaso na at ang iba ay iniimbestigahan pa,” ani Matibag.

Ipinaliwanag ng NBI director na mas malinaw ang pagpapatupad ng batas kapag ang mga fake account ay konektado sa mga paglabag na saklaw na ng Cybercrime Prevention Act of 2012, kabilang ang financial scams at love scams na umano’y nagmula sa mga dating operasyon ng POGO na bumagsak at naging scam hubs.

“Ang mga nahuhuli namin kaugnay ng Cyber Crime Law of 2012 ay mga financial scam, love scam, at iba pa. Ang ilan sa mga ito ay dating POGO operators na naging iba’t ibang scam hubs,” paliwanag niya.

Ayon kay Matibag, naiiba ang troll operations dahil gumagamit ito ng koordinadong kilos upang palabasing natural, kapanipaniwala, at tanggap ng marami ang isang mensahe o naratibo.

“Ang troll ay tinatawag nating inauthentic coordinated behavior. Parang may isang source sila pero pinalalabas nilang totoo ito,” sabi niya.

Dagdag pa niya, lalong lumalala ang problema kapag ang mga maling impormasyon ay kinakalat na rin ng totoong users gamit ang lehitimong mga account.

“Makikita mo na lang na kumakalat na ito sa social media, maraming totoong tao ang nakikibahagi hanggang maging organic na sa mga tunay na account. Doon na nagiging problema at tinutugunan namin ito,” ani Matibag.

Sinabi rin niyang kasalukuyang bumibili ang NBI ng mga kagamitan upang mapalakas ang kakayahan nitong tuklasin at labanan ang ganitong uri ng operasyon.

“Nasa proseso kami ng pagkuha ng mga tools upang labanan ang ganitong sistema,” sabi niya.

Nang tanungin tungkol sa AI-generated videos at images na nagpapakitang parang may sinabi o ginawa ang isang tao kahit hindi naman totoo, sinabi ni Matibag na kabilang din ito sa panukala ng NBI sa Kongreso.

“Iyan ang bahagi ng aming proposal sa Congress — dapat itong ma-regulate dahil maaaring nilalabag nito ang privacy ng isang tao, maganda man o masama ang pagkakalarawan sa kanya gamit ang AI,” ani Matibag.

Ayon sa kanya, ang paggamit ng AI sa pagkakahawig o imahe ng isang tao ay may kaakibat na isyu sa privacy kahit pa positibo o negatibo ang ipinapakita nito.

“Nakikita ko rin iyan,” dagdag niya.

Sinabi ng hepe ng NBI na nais ng bureau na makipagdayalogo sa mga mambabatas kung paano matutugunan ng batas ang maling paggamit ng AI, fake accounts, at organisadong panlilinlang online nang hindi iniiwan ang mga ahensiya ng gobyerno na kumikilos nang walang malinaw na legal na batayan.

“May sarili tayong privacy na dapat maprotektahan. Kaya makikipag-usap kami sa legislative body kung paano natin ito matutugunan,” ani Matibag.