SINABI ni House Deputy Speaker Paolo Ortega V ng La Union nitong nakaraang weekend na may mga umuusbong na mahusay na lider sa bansa tulad ni House Majority Leader Ferdinand Alexander “Sandro” A. Marcos, kahit na sila ay nagmula sa mga pamilyang politikal o dinastiya.

Sa Saturday News Forum na ginanap sa Dapo Restaurant sa Quezon City, sinabi ni Ortega na ang mga halal na opisyal ay dapat husgahan hindi lamang batay sa kanilang apelyido kundi lalo na sa kanilang pagganap sa tungkulin.

“Dapat may metrics na kasama, base sa pamumuno at kabuuang pamamahala. Kaya maganda po na may numero, hindi opinyon,” aniya.

Binanggit niya bilang halimbawa ng mga umuusbong na lider si Pasig City Mayor Vico Sotto, ang pamilyang Belmonte ng Quezon City, at si Sandro Marcos.

“Nandiyan si Vico Sotto, nandiyan si Sandro Marcos, nandiyan ang mga Belmonte,” sabi niya.

Ayon kay Ortega, hindi alam ng marami na seryosong-seryoso si Marcos sa kanyang tungkulin bilang Majority Leader at hindi ito kailanman lumiliban sa mga sesyon ng plenaryo.

Sa katunayan, itinuro ni Ortega na si Marcos ang unang dumadating sa session hall at siya rin ang huling umaalis.

“Higit sa kaalaman ng karamihan, ang Majority Leader namin ay hindi nag-aabsent. Kahit ano ang sabihin nila o anuman ang ibato nila, hindi po siya nag-aabsent. Siya ang unang nandoon at siya ang huling umaalis,” diin niya.

Sinabi rin niya na mayroon nang mga pag-aaral hinggil sa epekto ng mga pamilyang politikal sa mga lugar na kanilang pinamumunuan, at ilan sa mga ito ay nagpakita ng mga matagumpay na halimbawa.

“May mga ginawa na ring pag-aaral laban sa political dynasties, at may nakita akong mga artikulo tungkol sa matagumpay na mga pamilyang politikal,” aniya.

Ikinabahala ni Ortega na nagkaroon ng negatibong imahe sa isip ng publiko ang terminong “political dynasty.”

“Kapag dynasty kasi, parang negatibo agad ang konotasyon,” aniya.

Binigyang-diin niya ang pangangailangang linangin, suportahan, hikayatin at bigyang-inspirasyon ang susunod na henerasyon ng mga lider, maging sila man ay mula sa mga kilalang pamilyang politikal o mga bagong mukha sa politika.

“Diyan papasok na kailangan nating paunlarin, itaguyod, hikayatin at bigyang-inspirasyon ang susunod na henerasyon ng mga lider. Matunog man ang kanilang apelyido o hindi, nakikita naman ng mga tao ang kanilang kakayahan at husay,” aniya.

Sa unang bahagi ng forum, ipinagtanggol din ng lider ng Kamara mula sa La Union ang pagpasa ng House of Representatives sa panukalang batas laban sa political dynasty na inilarawan ng mga kritiko bilang “watered down” o pinahinang bersyon.

Ayon kay Ortega, ito ang pinakapraktikal na bersyon na katanggap-tanggap sa karamihan ng mga mambabatas, at isa itong “mahalaga at kinakailangang unang hakbang” na isinagawa ng kasalukuyang ika-20 Kongreso—isang hakbang na aniya’y hindi nagawa ng mga nagdaang Kongreso dahil sa kakulangan ng determinasyon.