Calendar
Hindi pinansin ni Barbers ang mga batikos ni VP Sara kay PBBM
HINDI pinansin ng adviser at tagapagsalita ng House prosecution team na si dating Rep. Ace Barbers nitong Biyernes ang mga bagong batikos ni Vice President Sara Z. Duterte laban kay Pangulong Ferdinand R. Marcos Jr., at sinabing malaya siyang magsabi ng anumang pahayag na nais niyang sabihin tungkol sa politika.
“She can say whatever she wants to say,” ani Barbers sa isang press briefing sa House of Representatives.
Tumugon si Barbers sa mga bagong batikos ni Duterte laban sa Pangulo at sa panawagan nitong umalis sa puwesto si Marcos, habang patuloy na lumalalim ang hidwaan sa pulitika sa pagitan ng dating magkaalyadong tumakbo noong 2022.
Sa halip na makipagtalo kay Duterte tungkol sa kanyang mga pahayag, maikli lamang ang naging tugon ni Barbers habang nananatiling nakatuon ang House prosecution team sa impeachment case na dinidinig ng Senado.
Noong Biyernes, mas pinaigting ni Duterte ang kanyang mga batikos laban kay Pangulong Marcos. Sa harap ng kanyang mga tagasuporta, inilarawan niya ang Punong Ehekutibo bilang isang sinungaling at mapang-abuso, bukod sa iba pa niyang mga batikos.
Ang kanyang mga bagong pahayag ay lumabas habang nahaharap siya sa impeachment trial at hiwalay na mga kasong kriminal na nag-ugat sa umano’y mga pagbabanta niya laban kay Pangulong Marcos, First Lady Liza Araneta-Marcos, at dating Speaker Ferdinand Martin G. Romualdez.
Nauna nang nakakita ang isang korte sa Quezon City ng probable cause upang ituloy ang tatlong bilang ng grave threats laban kay Duterte at naglabas ng warrant of arrest para sa kanya. Kalaunan ay naglagak siya ng piyansa at itinanggi ang pagbabanta sa tatlo.
Kasama rin sa mga paratang na ito ang mga kasong saklaw ng Articles of Impeachment na nililitis ng Senado.
Natapos na ng House prosecution team ang paglalahad ng ebidensiya para sa Article I na tumatalakay sa umano’y maling paggamit ng confidential funds. Nakatakda naman itong simulan sa Lunes, Setyembre 14, ang paglalahad ng ebidensiya para sa Article II na tumatalakay sa umano’y hindi maipaliwanag na yaman.
