NANINDIGAN ang House prosecution panel na mayroong batayang legal ang kanilang inihaing mosyon upang pasagutin si Vice President Sara Zimmerman Duterte sa inihaing Articles of Impeachment ng Kamara de Representantes laban sa kanya.

“The prosecution has collectively taken the stand that given the Constitution says that the trial under the Senate will proceed immediately forthwith, we are of the opinion that legally sound naman ang aming motion,” ayon kay 1Rider Rep. Rodge Gutierrez, miyembro ng House prosecution panel.

Inamin ni Gutierrez na maaaring iba ang pananaw ng Senado kaugnay nito kaya ipinasa ni Senate President Francis “Chiz” Escudero sa legal department ng Senado ang usapin.

“However, we do understand that the good Senate President might have a differing opinion and thus we would understand the reason for them to refer it to their legal team,” saad ni Gutierrez.

“But we remain confident that our submission is in line with our legal theory,” dagdag nito.

Una ng naghain ang prosecution panel ng Kamara, na pinamumunuan ni House Minority Leader Marcelino “Nonoy” C. Libanan, ng mosyon sa Senado na magsisilbing Impeachment Court upang maglabas ito ng summons kay VP Duterte upang siya ay pasagutin sa Articles of Impeachment na inihain noong Pebrero 5.

“We filed a motion for entry with motion to issue summons sa Senado,” ayon kag Libanan.

“Ito po ay tungkol sa pag-file ng House ng impeachment noong February 5 laban sa ating Vice President Sara Duterte. At pinirmahin po namin ito noong March 14 na entry with motion to issue summons,” ayon pa sa mambabatas. “Pero hindi namin kaagad na-file dahil ang tingin po namin ay break nila.”

Ipinunto ni Libanan na aktibo pa rin ang Senado sa kanilang mga gawain kahit nasa break.

“Sinasabi nila baka hindi sila makapagtrabaho dahil break na ‘yung Senado. Pero apparently, nagkaroon po sila ng hearing last Thursday no’ng committee ni Senadora Imee [Marcos]. Ibig sabihin, nagtatrabaho pa rin po ang Senado,” saad pa nito.

Binigyang-diin ni Libanan na handa ang House prosecution panel na gampanan ang kanilang tungkulin sa kabila ng panahon ng kampanya.

“Una ay pinahahayag po namin na handa, nakanda po ang House. Kahit po ngayon ay panahon din ng kampanya po namin, kami ni Congressman Rodge Gutierrez ay nangangampanya,” ani Libanan.

“Dahil inatasan po kami na maglitis, maging prosecutors, ay gagawin po namin ang aming tungkulin,” saad pa nito.

Binigyang-diin ni Libanan, batay sa panuntunan ng Senado, ang pangangailangan na agad simulan ang pagdinig.

“Ayon po sa rules of impeachment ng Senado, ‘pag mayroong nai-file sa Senado na impeachment complaint, the Senate shall start the proceedings forthwith, simulan kaagad,” giit ng kongresista.

“Anong ibig sabihin ng forthwith? Without delay, right away, without delay,” aniya.

Iginiit ni Libanan na dapat magpatuloy ang proseso ng impeachment nang mabilis at walang anumang pagkaantala. “So kahit anong ginagawa natin dahil napakahalaga po ito ay kailangan gumulong kaagad ang impeachment,” aniya.

Binigyang-diin din niya ang kahalagahan ng pagpapalabas ng summons sa Bise Presidente.

“At dahil po dito ay nag-motion kami na isyuhan ng summons ang ating Vice President para sagutin na po niya,” pahayag ni Libanan.

“Kaya napaka-importante po ang prosesong ito at dahil sa entry with motion to issue summons ay pasasagutin na ang ating Vice President in a period of 10 days from receipt in accordance with the impeachment rules of the Senate na hindi naman nila binabago hanggang ngayon,” dagdag pa niya.