PUMASOK na sa tinatawag na “ikatlong yugto” ang impeachment proceedings laban kay Bise Presidente Sara Duterte, ayon sa House Committee on Justice. Pormal na inutusan ng komite ang Bise Presidente na magsumite ng kanyang sagot sa loob ng 10 araw na hindi maaaring palawigin, habang ipinaalala sa publiko na may 60 session days ang komite upang isumite ang ulat nito sa plenaryo.

Sinabi ni Panel Chair Atty. Gerville “Jinky Bitrics” Luistro ng Batangas City na naipadala na ng komite ang abiso sa Bise Presidente matapos mapagpasyahan ng panel na sapat sa porma at substansya ang dalawang impeachment complaint.

“Gaya po ng narinig ninyo kahapon bago nag-adjourn ang Committee, nag-issue na po tayo ng notice sa Vice President para maghain siya ng kanyang sagot sa dalawang impeachment complaints sa loob ng non-extendable period na 10 araw,” ani Luistro sa isang panayam sa radyo.

Ipinaliwanag ni Luistro na ang proseso ay nasa yugto na kung saan nagpapalitan na ng pleadings ang mga panig at nagsisimula nang magsumite ng ebidensya sa komite.

“Gaya ng nasabi ko noon, tinatawag namin itong responsive pleadings. Responsive dahil nagsasagutan sila. Ito na ang tinatawag nating third stage. Lahat ng umaandar dito ay mga dokumento,” aniya.

Binigyang-diin din ng chair ng komite na habang calendar days ang sinusunod para sa paghahain ng responsive pleadings, ang mas malawak na deadline para sa gawain ng komite ay nakabatay sa session days.

“Ang tanging prescriptive period na nakasaad sa rules ay ang 60 session days kung kailan dapat maipadala ng Justice Committee ang committee report sa plenary,” paliwanag ni Luistro.

Nilinaw niya ang pagkakaibang ito nang tanungin kung ang timeline ay nakabatay sa calendar days.

“Hindi. Session days ito. Ang nakita ko lamang sa rules na gumagamit ng calendar days ay ang period ng paghahain ng responsive pleadings; ang iba ay session days,” dagdag ni Luistro.