MAAARING pilitin ng House Committee on Justice na ilabas ang mga bank records at papuntahin ang mahahalagang saksi habang dinidinig nito ang mga impeachment complaint laban kay Bise Presidente Sara Z. Duterte.

Ayon kay Chairperson Gerville “Jinky Bitrics” Luistro ng Batangas, ang impeachment proceedings ay kabilang sa mga eksepsyon sa Bank Secrecy Law.

Sinabi ni Luistro na may “power of compulsory process” ang komite, na nagbibigay dito ng kapangyarihang mag-utos ng pagsusumite ng mga dokumento—kabilang ang bank records—at pilitin ang mga saksi na magpatotoo sa mga pagdinig.

“At kailangan din nating maunawaan na ang Justice Committee ay pinagkalooban ng batas ng power of compulsory process. Ito ang tinatawag nating issuance of subpoena duces tecum kung may kinalaman ito sa mga mahalagang dokumento,” sinabi ni Luistro, na isang abogado, sa isang panayam sa radyo noong Huwebes.

Idinagdag niya na maaari ring gamitin ang kapangyarihang ito upang obligahin ang mga saksi na humarap sa komite, depende sa mga ebidensiyang nais iharap ng mga panig.

“Kaya parehong panig ay maaaring magsumite ng kinakailangang mosyon upang magamit nila ang compulsory process ng Justice Committee,” ani Luistro.

Nang tanungin kung maaaring gamitin ang bank secrecy upang hadlangan ang pagkuha ng mga financial records, ipinaliwanag ni Luistro na may eksepsyon dito sa ilalim ng impeachment.

“Ang impeachment proceeding ay eksepsyon sa Bank Secrecy Law,” sabi ni Luistro.

“Sa katunayan, iyon ang dahilan kung bakit sa pagdinig kahapon (Miyerkules) ay ipinaalam ko sa mga miyembro ng Justice Committee na ang impormasyon o records ng bangko ay protektado ng Bank Secrecy Law, kaya hindi natin maaasahan na naidikit na ng mga complainant ang mga bank records dahil ipinagbabawal iyon. Sa katunayan, ang impeachment lamang ang paraan kung saan maaaring siyasatin at makuha ang mga dokumentong ito nang hindi nilalabag ang Bank Secrecy Law,” paliwanag niya.

“Ang tanging paraan upang makahingi ng kopya ng bank documents ay sa pamamagitan ng compulsory process ng Justice Committee upang pilitin ang bangko na ilabas ang mga dokumentong ito. Ginagawa ito sa pamamagitan ng subpoena duces tecum,” dagdag ni Luistro.