𝗕𝗜𝗟𝗔𝗡𝗚 c𝗵𝗮𝗶𝗿𝗺𝗮𝗻 𝗻𝗴 𝗛𝗼𝘂𝘀𝗲 𝗖𝗼𝗺𝗺𝗶𝘁𝘁𝗲𝗲 𝗼𝗻 𝗠𝗲𝘁𝗿𝗼 𝗠𝗮𝗻𝗶𝗹𝗮 𝗗𝗲𝘃𝗲𝗹𝗼𝗽𝗺𝗲𝗻𝘁, i𝗸𝗶𝗻𝗮𝗴𝗮𝗴𝗮𝗹𝗮𝗸 𝗻𝗶 𝗠𝗮𝗻𝗶𝗹𝗮 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗹𝗮𝗻𝗱𝗼 “𝗖𝗥𝗩” 𝗠. 𝗩𝗮𝗹𝗲𝗿𝗶𝗮𝗻𝗼 𝗮𝗻𝗴 𝗶𝗻𝗶𝗹𝘂𝗻𝘀𝗮𝗱 𝗻𝗮 𝗶𝗻𝗶𝘀𝘆𝗮𝘁𝗶𝗯𝗮 𝗮𝘁 𝗽𝗿𝗼𝗴𝗿𝗮𝗺𝗮 𝗻𝗴 𝗠𝗲𝘁𝗿𝗼𝗽𝗼𝗹𝗶𝘁𝗮𝗻 𝗠𝗮𝗻𝗶𝗹𝗮 𝗗𝗲𝘃𝗲𝗹𝗼𝗽𝗺𝗲𝗻𝘁 𝗔𝘂𝘁𝗵𝗼𝗿𝗶𝘁𝘆 (𝗠𝗠𝗗𝗔) 𝗽𝗮𝗿𝗮 𝗽𝗮𝗻𝗮𝘁𝗶𝗹𝗶i𝗻𝗴 𝗺𝗮𝗹𝗶𝗻𝗶𝘀 𝗮𝗻𝗴 𝗶𝗹𝗮𝗻𝗴 𝗹𝘂𝗴𝗮𝗿 𝘀𝗮 𝗠𝗲𝘁𝗿𝗼 𝗠𝗮𝗻𝗶𝗹𝗮.

Nauna rito, isinagawa ng MMDA at Department of Interior and Local Government (DILG) ang kanilang inisyatiba upang mapanatiling malinis ang ilang lugar sa Kalakhang Maynila sa pamamagitan ng programa nitong Kalinga At Inisyatiba Para sa Malinis na Bayan (KALINISAN).

Sinabi ni Valeriano na maganda at kapuri-puri ang inilunsad na proyekto ng MMDA at DILG sapagkat ang pangunahing layunin nito ay ang pagpapanatili ng kalinisan sa Metro Manila lalo na sa mga lugar na talamak ang mga naglipanang basura.

Paliwanag ni Valeriano, ang mga hindi nakokolektang basura at nakatambak lamang sa mga ilog at estero ang isa sa mga dahilan kung bakit naging malala ang pagbaha sa Metro Manila noong kasagsagan ng pananalasa ng bagyong Carina lalo na sa mga pangunahing lugar sa National Capitol Region (NCR).

Umaasa din ang kongresista na hindi lamang ang MMDA at DILG ang kikilos para mapanatiling malinis ang Kalakhang Maynila. Bagkos, kailangan din aniya ang partisipasyon at pakikiisa ng bawat mamamayan at komunidad.

Pagdidiin ni Valeriano, masasayang lamang aniya ang pagsisikap ng dalawang ahensiya kung pagkatapos nilang linisin ang ilang lugar sa Metro Manila ay muli na namang magkakalat ang mga pasaway na mamamayan gaya ng pagtatapon ng kanilang basura kung saan-saan.

Ayon pa kay Valeriano, napakalaking perwisyo ang idinudulot ng mga nagkalat na basura sa mga ilog at estero dahil maraming sakit ang maaaring makuha mula dito. Kasama na dito ang pagdagsa ng mga daga sa mga basurang nakatambak.