MARIING itinanggi ng kampo ni dating Speaker Ferdinand Martin G. Romualdez ang mga tangkang idikit sa kanya ang kasong pandarambong (plunder) at iba pang mabibigat na krimen, at iginiit na mismong ang Independent Commission for Infrastructure (ICI) ang nagsabing ang kanilang referral sa Ombudsman ay “inilabas nang walang natuklasan o konklusyon ng pagkakasala o pananagutan.”

Sa isang pahayag, sinabi ni Atty. Ade Fajardo, abogado at tagapagsalita ni Romualdez, na ang mga kamakailang pahayag na iniuugnay sa Department of Public Works and Highways (DPWH) ay hindi dapat bigyang-kahulugan bilang patunay ng anumang maling gawain.

“Pinapansin namin ang pahayag ng Kalihim ng DPWH. Gayunpaman, mahalagang linawin na ang isang ‘rekomendasyon’ ng DPWH ay hindi isang finding, lalo na hindi ito isang pagpapasya ng pagkakasala,” ayon kay Fajardo.

Mariing itinanggi ni Fajardo ang mga ulat na nagsasabing inirekomenda ng ICI ang pagsasampa ng kasong plunder o iba pang mabibigat na kaso laban sa dating Speaker.

“Hindi totoo na inirekomenda ng ICI sa Ombudsman na kasuhan ng plunder o iba pang seryosong krimen si dating Speaker Ferdinand Martin G. Romualdez na may kaugnayan sa flood control o sa isyu ng 2025 budget,” ani Fajardo.

Sa halip, binigyang-diin niya na mismong ang ICI ang naglinaw na walang anumang masamang konklusyon laban kay Romualdez sa kanilang referral sa Office of the Ombudsman.

“Sa katunayan, malinaw na sinabi ng ICI sa kanilang referral report na ito ay ‘inilabas nang walang natuklasan o konklusyon ng pagkakasala o pananagutan sa panig ni dating Speaker Romualdez,’” dagdag pa niya.

Ayon kay Fajardo, iginagalang ni Romualdez ang mga prosesong pang-institusyon at kumpiyansa siyang tatasahin ng Ombudsman ang usapin nang malaya at patas.

“Iginagalang namin ang due process at hihintayin namin ang Ombudsman na independiyenteng suriin ang mga isinumiteng dokumento batay sa ebidensya, hindi sa mga pahayag sa press conference,” aniya.