Kelot may tama ng bala, patay na nakita sa hotel

20 Views

NATAGPUANG patay at may tama ng bala sa ulo ang 52-anyos na lalaki sa isang room sa hotel sa Quezon City noong Miyerkules.

Ayon sa report, bandang alas-3:30 ng hapon natagpuan ang bangkay ng lalaki sa hotel sa Novaliches, Quezon City.

Batay sa imbestigasyon ni P/SMS Julius P. Raz, bago matagpuang patay nagpadala pa umano ng mensahe ang biktima na nagpapaalam na sa kanyang pamilya at sinabing siya’y nasa hotel.

Agad namang tumawag sa reception ng nasabing hotel ang misis ng biktima at nakiusap na puntahan ang silid ng kanyang mister.

Pumunta ang hotel supervisor sa silid ng biktima subalit nang mabuksan ang pinto bumungad sa kanila ang duguang biktima sa kama.

Dumating ang SOCO Team mula sa QCPD Forensic Unit sa pangunguna ni P/Captain Ray Ebol at nasamsam sa crime scene ang isang kalibre .45 na baril, fired cartridge case, dalawang magazine, walong live ammunition at isang suicide note.

Hindi na pinaiimbestigahan ng pamilya ang insidente dahil kumbinsido na nagpatiwakal ang biktima at hindi binanggit ang dahilan ng pagpapatiwakal.