Sa loob ng sementeryo

NATAGPUANG laslas ang leeg at putol ang kaliwang kamay bukod sa naliligo sa sariling dugo ang lalaking nadiskubre sa Taytay Memorial Garden Cemetery sa Barangay San Juan, Taytay, Rizal, noong Linggo.

Sa report ng pulisya ng Taytay, nanatiling hindi pa kilala ang biktima ng hacking incident na nakasuot ng kulay gray at red na t-shirt, itim na short pants at tinatayang nasa 40-anyos hanggang 50 taong gulang ang edad.

Hanggang Lunes, hindi pa rin nakikilala ang suspek dahil sa walang makapagturo.

Ang lalaking nakadiskubre sa bangkay dakong alas-5:30 ng madaling araw ay kasalukuyang may ginagawa sa sementeryo nang tumambad sa kanya ang hindi kilalang biktima at ito’y kanyang ipinagbigay-alam sa pulisya ng Taytay.