HUMILING si Senator Panfilo “Ping” Lacson ng imbestigasyon ng Senado sa patuloy na pagtaas ng singil sa kuryente, mga reklamong may kaugnayan sa meter reading at system losses na isinasama sa singil na binabayaran ng mga konsyumer.

Inihain ni Lacson ang Senate Resolution No. 511 upang siyasatin ang patuloy na pagtaas ng power rates at kung sapat ang umiiral na mga regulasyon upang protektahan ang mga konsyumer laban sa labis, hindi makatwiran o maiiwasang singil.

Binanggit niya ang mga ulat ng “bill shock” sa mga kostumer ng Manila Electric Company (Meralco), kabilang ang malalaki at hindi maipaliwanag na pagtaas sa kanilang buwanang bayarin.

“While access to affordable and reliable electricity is fundamental to promoting Filipinos’ welfare, national productivity, and economic development, residential electricity rates in the Philippines are among the highest in Southeast Asia,” sinabi ni Lacson sa resolusyong inihain noong Lunes.

Ayon sa resolusyon, nasa $0.18 hanggang $0.21 kada kilowatt-hour ang residential electricity rates sa Pilipinas, pangalawa sa average na humigit-kumulang $0.23 kada kWh ng Singapore sa Southeast Asia.

Binanggit din ni Lacson ang pagtaas ng residential rate ng Meralco mula P13.2730 kada kWh noong Enero hanggang P14.8261 kada kWh noong Hulyo 2026, o pagkakaibang P1.5531 kada kWh.

Para sa isang tahanang gumagamit ng 200 kWh kada buwan, katumbas ito ng tinatayang P310.62, hindi pa kasama ang pagbabago sa konsumo at iba pang billing adjustments.

Binanggit din sa resolusyon ang pahintulot ng Energy Regulatory Commission sa Meralco at apat na power generation companies na mabawi ang P31.34 bilyon sa mga gastusing nagmula sa changes in circumstances.

Sinabi ni Lacson na dapat suriin sa imbestigasyon ang epekto ng naturang recovery at iba pang bahagi ng singil sa bayarin sa kuryente.

Itinaas ng Meralco ang singil nito ng P0.5335 kada kWh noong Abril. Matapos bumaba noong Mayo, tumaas muli ang rate ng P0.1488 kada kWh noong Hunyo at P0.3428 kada kWh noong Hulyo.

Kinilala ni Lacson na maaaring maapektuhan ang presyo ng kuryente ng kakulangan sa suplay, tensiyong heopolitikal, generation costs, presyo ng fuel, pagbabago sa foreign exchange at mandatory charges.

“While fluctuations in electricity prices may be attributed to supply constraints due to geopolitical tension, higher generation costs, foreign exchange rates, mandatory charges, and other market factors, it is incumbent upon the legislature to exercise its oversight function,” aniya.

Sinabi niyang dapat tukuyin ng Kongreso kung epektibong napoprotektahan ng mga regulatory mechanism ang mga konsyumer laban sa labis o maiiwasang pagtaas ng singil.

Nagpahayag din ang resolusyon ng pangamba sa umano’y mga iregularidad sa meter reading at system-loss charges.

Ang system loss ay kuryenteng nawawala bago makarating sa mga konsyumer. Nangyayari ang technical losses sa transmission at distribution, habang ang non-technical losses ay maaaring magmula sa meter tampering, illegal connections, billing errors at pagnanakaw ng kuryente.

Sinabi ni Lacson na kinukuwestiyon ng mga konsyumer kung bakit isinasama sa kanilang bayarin ang mga pagkaluging kaugnay ng mga ilegal na gawain at sinasagot ng “law-abiding and paying consumers.”

Binanggit din niya ang posisyon ng mga consumer advocate na maaaring mabawasan ang insentibo ng mga utility na ayusin ang kanilang operasyon at sugpuin ang pagnanakaw ng kuryente kung ipinapasa sa mga kostumer ang system losses.

Sinabi ni Lacson na layunin ng panukalang imbestigasyon na palakasin ang transparency, accountability at proteksiyon sa mga konsyumer sa industriya ng kuryente.

Kailangan pang i-refer ang resolusyon sa naaangkop na komite ng Senado.