NAGBABALA si Senator Panfilo “Ping” Lacson kay Senate President Pro Tempore at Acting Senate President Sherwin Gatchalian na mag-ingat kung papayag itong makipagpulong kay Senate President Alan Peter Cayetano sa gitna ng patuloy na sigalot sa liderato ng Senado.

Ginawa ni Lacson ang babala sa isang post sa X, kung saan binanggit niya si Chinese military strategist Sun Tzu at binalaan si Gatchalian laban sa tinukoy niyang mga taktika ni Cayetano.

“Sun Tzu’s Art of War: If you know the enemy and know yourself, you need not fear the result of a hundred battles. If you know yourself but not the enemy, for every victory you will also suffer a defeat. If you know neither the enemy nor yourself, you will succumb in every battle,” sabi ni Lacson.

“I’m sure Win would know how to handle Alan in case he decides to meet with him, like what the disgraced ex-SP is capable of doing, but a little reminder through that famous quote from Sun Tzu might help,” dagdag niya.

Kasama sa post ang larawan ni Cayetano na may linyang, “I’ll offer you a solution, Sen. Win,” at isa pang linya na nagsasabing, “Imagine that, the problem wants to offer a solution.”

Sinabi ni Lacson na dapat alam na ni Gatchalian ang mga kilos ni Cayetano, na aniya ay nakita noong May 11 leadership change na nagluklok kay Cayetano bilang Senate President.

Inakusahan niya si Cayetano na ginamit ang sitwasyon ng ilang senador, kabilang si Senator Ronald dela Rosa, upang makuha ang 13 boto na kailangan para palitan si dating Senate President Vicente “Tito” Sotto III.

Nahalal si Gatchalian bilang Senate President Pro Tempore at Acting Senate President matapos magpulong ang 12 senador noong June 3 at magdeklara ng quorum sa kabila ng boycott ni Cayetano sa regular sessions ng Senado.

Bago ang June 3 leadership change, nanawagan si Lacson at iba pang miyembro ng dating minority bloc na magbitiw si Cayetano bilang Senate President, dahil sa tinukoy nilang dereliction of duty at kawalan ng kakayahang pamunuan ang Senado.

Binatikos din ni Lacson si Cayetano sa paggigiit na siya pa rin ang Senate President at maaari siyang mamuno sa impeachment trial ni Vice President Sara Duterte.

Ang babala ay lumabas habang patuloy ang sigalot sa liderato ng Senado, kabilang ang usapin kung sino ang may awtoridad sa kapulungan, sa mga komite, at sa impeachment process.