NAGBABALA si Senator Raffy Tulfo nitong Lunes laban sa pagturing na “bayani” sa 18 umano’y dating bodyguards na iniuugnay sa flood-control controversy bago pa masuri sa ilalim ng panunumpa ang kanilang mga pahayag, dahil maaari aniyang ilagay sila nito sa pedestal at bigyan ng kredibilidad ang kanilang mga salaysay kahit hindi pa nasusuri.

Sinabi ni Raffy na hinintay niya ang Blue Ribbon Committee hearing na pinamunuan ni Senator Erwin Tulfo upang harapin ang mga resource persons na naunang iniharap kaugnay ng umano’y paghahatid ng mga maleta.

“I waited for today’s hearing to confront the resourceful persons they presented. Let me call on them, labing walong kargador. Kasi nga po, nagkakarga sila ng mga mali-maletang pera, sabi nga nila,” sabi ni Raffy.

Sinabi niya na dapat munang alamin ng Senado kung sino talaga ang mga testigo, saan sila galing, sino ang naghanda ng kanilang mga pahayag, sino ang gumabay sa kanila, at kung may ebidensiyang sumusuporta sa kanilang mga alegasyon.

“We cannot simply bring in people sa Blue Ribbon Committee na nag-aakusa na mabibigat na paratang nang hindi man lang nalaman kung karapat dapat ba sila paniwalaan,” sabi ni Raffy.

Tinutulan din ni Raffy ang naunang pagtawag sa mga testigo bilang “18 Marines,” at sinabing maaaring bigyan sila ng label na ito ng kredibilidad bago pa masuri ang kanilang background at mga pahayag.

“Kasi, simulang-simula pa lamang po na tinawag silang 18 Marines, may paglilinlang na agad. Yung bansag na 18 Marines ay isang paraan upang pabanguhin sila sa publiko,” sabi niya.

Sinabi niya na hindi lahat sa kanila ay dating Marines, at mahigit kalahati umano sa kanila ay discharged without honors o dishonorably discharged from service dahil sa iba’t ibang paglabag, kabilang ang AWOL.

“Why is this information very important? Because for people to believe their allegations, it must come from a credible and reliable source,” sabi ni Raffy.

Sinabi ni Raffy na hindi dapat madala ang imbestigasyon sa mga label gaya ng “bayani,” “former Marines,” o “whistleblowers” dahil maaaring maimpluwensiyahan nito ang pananaw ng publiko bago pa masuri ng Senado ang kanilang kredibilidad.

“And so, the people using them portray them as heroes. Sabi nga ng isa sa mga senador na dumalun nung araw na yon, bayani daw po sila,” sabi niya.

Tinanggihan niya ang label na “bayani,” at sinabing hindi makatarungang maitabi ang mga testigo sa mga pambansang bayani at overseas Filipino workers habang hindi pa nasusuri ang kanilang mga alegasyon.

“Pasensya na, hindi ako papayag na maitabi ang mga sinungaling neto, kila Jose Rizal, Andres Bonifacio, at mga dakila nating OFWs,” sabi ni Raffy.

Sinabi ng senador na dapat silang ituring muna bilang “kargador” na kailangang masuri ang mga alegasyon sa pamamagitan ng direktang pagtatanong, corroborative evidence, at sworn testimony.

Sinabi ni Raffy na dapat ding tingnan ng komite ang mga nasa likod ng mga testigo at alamin kung may grupo o network na tumulong sa pag-oorganisa ng kanilang pagharap, paghahanda ng kanilang mga pahayag, pagpopondo sa kanilang kilos, o paggabay sa timing at direksyon ng kanilang mga alegasyon.

Aniya, kung ginagamit ang mga testigo upang lumikha ng public narrative o idawit ang ilang opisyal sa pamamagitan ng mga pahayag na hindi pa nasusuri, dapat mailantad ng Senado hindi lamang ang umano’y maling testimonya kundi pati ang mga taong maaaring nag-orkestra nito.

Para kay Raffy, ito ang “sindikato” question: kung ang kontrobersiya ay tungkol lamang sa umano’y kickbacks sa flood-control projects, o kung may hiwalay ding pagsisikap na gamiting sandata ang mga testigo at affidavit laban sa political targets.

Ang mga testigo, kasama ang kanilang abogado na si Atty. Levito Baligod, ay nasa Senado bilang mga bisita ni Senator Robinhood Padilla at nagsagawa ng press conference sa opisina ni Padilla, ngunit hindi dumalo sa Blue Ribbon meeting kung saan nakahanda ang mga senador na tanungin sila.

Sinabi ni Raffy na dapat tukuyin ng komite kung sino ang kumuha sa mga testigo, sino ang tumulong sa paghahanda ng kanilang mga pahayag, sino ang nagturo sa kanila, at sino ang makikinabang sa mga alegasyong nagdawit sa pangalan ng ilang opisyal.

Ang Blue Ribbon meeting ay ginanap din matapos tingnan ng National Bureau of Investigation ang mga alegasyon na may perang inalok sa ilang testigo upang tumestigo kaugnay ng flood-control controversy, isang pahayag na kailangan pang beripikahin.

Sinabi ni Raffy na dapat sundan ng Senado ang dalawang linya ng imbestigasyon: ang orihinal na flood-control scandal na kinasasangkutan ng pondo ng bayan, contractors, government officials, at umano’y kickbacks; at ang posibilidad na may ilang alegasyong hinubog o ginamit ng mga taong nasa likod ng mga testigo.

Sinabi niya na dapat mailantad ang mga responsable sa korapsyon sa flood-control projects, ngunit kung mali o itinurong testimonyo ang ginamit upang idawit ang ilang opisyal, dapat ding tukuyin ang mga nasa likod nito.