NANAWAGAN noong Lunes si House Committee on Justice Chair Gerville “Jinky Bitrics” Luistro na ituloy ang kaso sa paglilitis sa Senado, at iginiit na dapat manaig ang Konstitusyon, due process, at ebidensya laban sa takot, panggigipit, at ingay ng pulitika.

Sa kanyang talumpati bilang sponsor ng Committee Report No. 261 at House Resolution No. 989 na naglalaman ng Articles of Impeachment laban kay Duterte, hinimok ni Luistro ang kanyang mga kasamahan na hayaang magpatuloy ang prosesong konstitusyonal at bigyan ang Senado ng pagkakataong marinig ang buong katotohanan.

“Ang hinihingi lamang natin ngayon ay ipagpatuloy ang proseso. Bigyan natin ng pagkakataon ang Senado na dinggin ang buong katotohanan,” ani Luistro.

“Hayaan nating manaig ang ebidensya. Hayaan nating manaig ang proseso. Hayaan nating manaig ang Konstitusyon. At sa huli, hayaan nating manaig ang bayan.”

Binigyang-diin ni Luistro na ang paglilitis sa Senado ay magbibigay kay Duterte ng pagkakataong sagutin ang bawat alegasyon at iharap ang kanyang depensa sa harap ng sambayanang Pilipino.

“At sa Senado, naroon ang pagkakataon ng Bise Presidente na sagutin nang buo ang bawat alegasyon, iharap ang kanyang ebidensya, at marinig ng buong sambayanan ang kanyang panig,” aniya.

Tinawag ni Luistro na isa sa pinakamabibigat na desisyong gagawin ng mga mambabatas ang pagboto sa impeachment, at nagbabala laban sa pagpapairal ng takot o presyur sa pulitika kapalit ng tungkuling konstitusyonal.

“Ang pagboto natin ngayon ay hindi lamang tungkol sa isang tao. Ang pagboto natin ngayon ay tungkol sa uri ng Republika na nais nating ipamana sa susunod na henerasyon,” aniya.

“Kung mananaig ba ang pananagutan—o ang takot. Kung mananaig ba ang katotohanan—o ang ingay. Kung mananaig ba ang Konstitusyon—o ang kapangyarihan.”

Iginiit ni Luistro na ang impeachment proceedings ay bunga ng masusing prosesong konstitusyonal at hindi produkto ng pulitika o presyur mula sa social media.

“Hawak po natin ngayon ang bunga ng mahabang proseso. Hindi ito nabuo sa isang gabi. Hindi ito produkto ng tsismis, galit, o sigaw sa social media,” aniya.

Ayon kay Luistro, maingat na sinunod ng komite ang due process sa buong proceedings, kabilang ang pagsunod sa one-year constitutional bar rule at pagsasagawa ng mga pampublikong pagdinig na bukas at naka-livestream para sa sambayanang Pilipino.

“Hindi tayo naghanap ng shortcut. Naghanap tayo ng katotohanan,” aniya.

Tinanggihan din niya ang mga alegasyong ang impeachment proceedings ay pag-atake laban sa mga tagasuporta ni Duterte, at sinabi na ang pananagutan sa ilalim ng Konstitusyon ay dapat ipatupad nang patas sa lahat ng opisyal ng gobyerno anuman ang kapangyarihan, popularidad, o partidong kinabibilangan.

“Hindi ito usapin ng apelyido, partido, o rehiyon. Ang prinsipyo ng pananagutan ay dapat umiiral kanino man—kaalyado man o kalaban,” aniya.

Tinukoy ni Luistro ang mga dokumentaryong ebidensyang iniharap sa komite, kabilang ang mga sertipikasyon mula sa Philippine Statistics Authority, mga disallowance ng Commission on Audit, ulat ng Anti-Money Laundering Council (AMLC), at iba pang dokumento ng gobyerno na bahagi na ngayon ng records ng Kamara.

“May mga tanong na hindi na maaaring iwasan. May mga isyung hindi na maaaring ipagkibit-balikat. May mga bagay na kailangan nang harapin ng buong bansa,” aniya.

Kasama sa Articles of Impeachment ang mga alegasyon hinggil sa maling paggamit ng confidential funds, hindi maipaliwanag na yaman at umano’y pagkakaiba sa Statements of Assets, Liabilities and Net Worth, mga akusasyon ng panunuhol, at umano’y pagbabanta laban kina Pangulong Ferdinand R. Marcos Jr., First Lady Liza Araneta-Marcos, at dating Speaker Ferdinand Martin G. Romualdez.

Naglaan din si Luistro ng malaking bahagi ng kanyang talumpati sa umano’y mga pagbabanta at mararahas na pahayag na iniuugnay kay Duterte, at sinabing hindi maaaring basta na lamang balewalain ang mga ito bilang karaniwang retorika sa pulitika.

“Sapagkat ang mga salita ng mga pinuno ay may bigat. Maaari silang magbigay ng kapanatagan—o maghasik ng pangamba sa sambayanan,” aniya.