“HABANG papalapit tayo sa impeachment trial, hindi na lamang ito usapin ng pulitika. Ito ay tungkol na sa konsensya, tungkulin, at kinabukasan ng ating bansa.”

Ito ang sinabi ni Manila 6th District Rep. Bienvenido “Benny” Abante Jr. noong Lunes matapos siyang bumoto pabor sa Articles of Impeachment laban kay Vice President Sara Duterte, na inaprubahan ng Kamara sa botong 255 pabor, 26 tutol, at siyam na abstention.

Binigyang-diin ni Abante na ang kanyang boto ay hindi nakabatay sa pulitika o personalidad ng sangkot, kundi sa kanyang itinuturing na tungkuling konstitusyonal ng mga mambabatas na panatilihin ang pananagutan kapag may seryosong alegasyon laban sa matataas na opisyal na sinusuportahan ng ebidensya.

“Uulitin ko po ito: this is not about 2028. This is not about political alliances. This is about whether we still believe that no one is above the law. And I believe this with all my heart—and so do many of my colleagues,” ani Abante.

Nanawagan ang beteranong mambabatas at pastor sa sambayanang Pilipino na ipagdasal ang mga senador na uupo bilang mga hukom sa impeachment court, at sinabing kailangan ng bansa ang karunungan, pagiging patas, at moral na katatagan sa mga darating na mahihirap na araw.

Binanggit ni Abante ang James 5:16 mula sa King James Version: “Confess your faults one to another, and pray one for another, that ye may be healed. The effectual fervent prayer of a righteous man availeth much.”

“Hinihiling ko sa ating mga kababayan na manalangin—hindi upang manaig sa pulitika ang isang panig o kabila—kundi upang manaig ang katotohanan at upang gabayan ng karunungan, pagiging patas, at integridad ang ating mga senator-judges. Ipanalangin natin na manaig ang kanilang konsensya at gabayan sila ng ebidensyang nakaharap sa kanila—sa halip na ng presyur sa pulitika mula sa iba’t ibang kampo.”

“Ang impeachment ay hindi dapat gawing laro ng pulitika. Isa itong prosesong konstitusyonal na may mga epekto hindi lamang sa kasalukuyan kundi pati sa mga susunod na henerasyon. Karapat-dapat ang sambayanang Pilipino sa isang paglilitis na patas, walang kinikilingan, at nakabatay sa rule of law,” diin ni Abante.

Itinuro ni Abante na lubos na nauunawaan ng mga mambabatas na hahatulan ng kasaysayan ang mga desisyong gagawin sa mga susunod na linggo, at sa ganitong pananaw niya isinasaalang-alang ang halimbawang iiwan ng kanyang boto para sa kanyang pamilya at mga apo.

“Pagkaraan ng maraming taon, babalikan ng aking mga apo ang sandaling ito at tatanungin kung paano bumoto ang kanilang Lolo noong hinarap ng bansa ang mahihirap na usapin tungkol sa katotohanan, pananagutan, at hustisya. Nais kong malaman nila na nanindigan ako sa panig ng konsensya at paninindigan. Nais kong ipagmalaki nila na pinili ng kanilang lolo na gawin ang pinaniniwalaan niyang tama.”