NAGBABALA si Sen. Panfilo “Ping” Lacson na maaaring humarap sa mga reklamo ang mga testigo at opisyal ng gobyerno na lumahok sa June 4 Blue Ribbon proceeding na pinangunahan ng kampo ni dating Senate President Alan Peter Cayetano.

Maaaring hindi magamit ng mga nagbigay ng pahayag sa proceeding, kabilang ang 18 dating sundalo na nag-ugnay sa ilang personalidad sa umano’y paghahatid ng pera gamit ang mga maleta, ang proteksiyong karaniwang ibinibigay sa mga kalahok sa opisyal na legislative proceedings.

“Yes, they can be charged, possibly for cyber libel and other crimes since it was a bogus hearing and no parliamentary immunity may be invoked, not even the senators who participated,” sabi ni Lacson.

Isinagawa ang June 4 proceeding sa session hall ng Senado sa gitna ng patuloy na sigalot sa liderato sa pagitan ng kampo ni dating Senate President Alan Peter Cayetano at ng grupong naghalal kay Senador Sherwin Gatchalian bilang Acting Senate President at Senate President Pro Tempore.

Maaaring kabilang sa mga reklamo ang cyber libel laban sa mga gumawa ng mga paratang.

Ang mga opisyal ng gobyerno na lumahok sa proceeding ay maaari ring maharap sa usapin ng usurpation of authority or official functions kung nagsagawa sila ng opisyal na gawain nang walang legal na kapangyarihan.

“Only if the SC will overturn the Avelino vs Cuenco ruling and invalidate the action taken by the 12 senators last Wednesday, those who were offended in yesterday’s event have a good case,” sabi ni Lacson.

Naganap ang pagbabago sa liderato noong Hunyo 3 matapos sumama si Sen. Francis “Chiz” Escudero sa 11 miyembro ng noo’y minority bloc sa sesyon.

Ginamit ng grupo ang Avelino v. Cuenco upang igiit na may quorum, na nagbigay-daan para ideklarang bakante ang mga posisyon sa Senado at maghalal ng bagong mga opisyal.

Nanindigan si Cayetano na nananatili siyang Senate President, habang iginiit naman ng bagong mayorya na si Gatchalian na ang gumaganap na Senate President kasunod ng leadership vote.