𝗜𝗣𝗜𝗡𝗔𝗔𝗕𝗢𝗧 𝗻𝗴 c𝗵𝗮𝗶𝗿𝗺𝗮𝗻 𝗻𝗴 𝗛𝗼𝘂𝘀𝗲 𝗖𝗼𝗺𝗺𝗶𝘁𝘁𝗲𝗲 𝗼𝗻 𝗧𝗼𝘂𝗿𝗶𝘀𝗺 𝗻𝗮 𝘀𝗶 𝗥𝗼𝗺𝗯𝗹𝗼𝗻 𝗟𝗼𝗻𝗲 𝗗𝗶𝘀𝘁. 𝗖𝗼𝗻𝗴. 𝗘𝗹𝗲𝗮𝗻𝗱𝗿𝗼 𝗝𝗲𝘀𝘂𝘀 “𝗕𝘂𝗱𝗼𝘆” 𝗙. 𝗠𝗮𝗱𝗿𝗼𝗻𝗮 𝗮𝗻𝗴 𝗸𝗮𝗻𝗶𝘆𝗮𝗻𝗴 𝘁𝗮𝗼𝘀 𝗽𝘂𝘀𝗼𝗻𝗴 𝗽𝗮𝘀𝗮𝘀𝗮𝗹𝗮𝗺𝗮𝘁 𝗸𝗮𝘆 𝗣𝗿𝗲𝘀𝗶𝗱𝗲𝗻𝘁 𝗙𝗲𝗿𝗱𝗶𝗻𝗮𝗻𝗱 “𝗕𝗼𝗻𝗴𝗯𝗼𝗻𝗴” 𝗥. 𝗠𝗮𝗿𝗰𝗼𝘀, 𝗝𝗿. 𝗱𝗮𝗵𝗶𝗹 𝘀𝗮 𝗽𝗮𝘁𝘂𝗹𝗼𝘆 𝗻𝗮 𝘀𝘂𝗽𝗼𝗿𝘁𝗮 𝗻𝗴 𝗮𝗱𝗺𝗶𝗻𝗶𝘀𝘁𝗿𝗮𝘀𝘆𝗼𝗻 𝗻𝗶𝘁𝗼 𝘀𝗮 𝗶𝗻𝗱𝘂𝘀𝘁𝗿𝗶𝘆𝗮 𝗻𝗴 𝘁𝘂𝗿𝗶𝘀𝗺𝗼.

Paliwanag ni Madrona, dahil sa suportang ibinibigay ng administrasyong Marcos, Jr. sa tourism industry, malaki ang naiaambag nito sa kaban ng panahalaan o sa ekonomiya ng bansa na itinuturing na “economic driver” dahil sa malaking ganansiya na nakukuha mula sa turismo.

Ayon kay Madrona, mula ng magwakas ang mahaba-habang pamumuksa ng COVID-19 sa bansa, malaki na ang inasenso ng Philippine tourism sapagkat nagbalik na ang dating sigla nito sa pamamagitan ng pagdagsa ng milyong turista mula sa iba’t-ibang panig ng mundo.

Sabi din ng kongresista, hindi basta-basta matatawaran ang ibinibigay na suporta ng Punong Ehekutibo para sa tourism industry sapagkat maaaring nakikita nito ang malaking potensiyal ng Philippine tourism upang unti-unting maibangon ang ekonomiya ng bansa mula sa pandemiya.

Pagdidiin pa ni Madrona, dahil sa mahusay na pamumuno ni Department of Tourism (DOT) Sec. Maria Christina Garcia Frasco, naging tanyag ang turismo ng Pilipinas sa buong mundo kaya maaaring ito rin aniya ang dahilan kung bakit napakaraming turista ang dumadagsa sa Pilipinas.

Dagdag pa ni Madrona, hindi lamang malaking ganansiya ang natatamo ng tourism industry kundi ang mga prestisyosong parangal gaya ng pagiging tagapangulo nito ng United Nation (UN) Tourism Regional Commission para sa Silangang Asia at Pasipiko. Kasama na dito ang pribilehiyo para maging host ng mga Joint Commission Meetings na idinadaos sa bansa.

Nagbigay pugay din ang mambabatas sa pagsisikap ni Pangulong Marcos, Jr. na maitaas ang kalidad ng turismo sa Pilipinas sa pamamagitan ng mga isinusulong nitong programa at proyekto.